K R Y T

Sondag 29 Julie 2001

Inhoudsopgawe

Kommentaar

Wittes het God gesteel, sê Gautengse oud-premier

Markus Sadie aan Bareng Pooe oor "Hollandse Suid-Afrikaners"

"U mag maar woon op ons grondgebied" - repliek van Bareng Pooe"

"Afrikane kan leer van Afrikaners" - Sadie aan Pooe

(Nog artikels volg binnekort)

Kopiereg voorbehou op die inhoud.

KRYT verskyn weekliks. Telnr. 011 325 0817. Faks 011 325 0819. E-pos: inlig@praag.org.

Redakteur: Dan Roodt. Grafiese versorging: Karin Roodt. Administrasie: Monya Crause.

Kommentaar

Wat het geword van die Gerwel-komitee?

Die Gerwel-komitee sou teen einde Julie sy bevindinge bekend maak, ná meer as 20 Afrikaanse organisasies inderhaas bymekaar gekom het om ‘n gesamentlike voorlegging daaraan te maak. Omtrent ‘n halfdosyn van die organisasies het hul eie individuele voorleggings ook gemaak, wat aantoon in watter mate die universiteitstaalkwessie gemoedere gaande maak in die Afrikaanse gemeenskap.

Sedertdien was daar geen terugvoering vanaf die komitee nie. Ontvangs van die voorleggings is wel erken. Indien dit intussen agter geslote deure vergader het, sou die breë publiek niks daarvan weet nie, want geen persverklarings of ander inligting is vrygestel nie.

Met die aanvanklike aanstelling van die komitee, wat blykbaar op die aandrang van die Naspers-uitvoerende beampte, mnr. Koos Bekker, deur Minister Kader Asmal geskied het, was daar reeds ‘n groot mate van skeptisisme oor die komitee. In die eerste instansie is die samestelling daarvan verdag, omdat dit hoofsaaklik uit ANC-gesindes bestaan waarvan ‘n groot aantal boonop nie-Afrikaanssprekendes is met weinig of geen begrip van die taalkwessie nie. Prof. Gerwel self is iemand wat hom al herhaaldelik uitgespreek het ten gunste van die nasiebou-ideaal en die assimilasie van Afrikaners binne, soos hy dit noem, ‘n “breë Suid-Afrikaansheid”. Ook ander lede van die komitee soos me. Antjie Krog/Samuel is bekend om hul omstrede sienings van die standaardtaal en ‘n vyandige ingsteldheid daarteenoor. Die spel is dus eintlik vooraf gespeel, en dit sou verbaas indien die Gerwel-komitee hoegenaamd enige toegewings maak aan die Afrikaanse organisasies.

‘n Ander aspek van die komitee wat reeds van die begin af ter sprake was, is die feit dat Minister Kader Asmal se Hoër Onderwysplan reeds finaal is, en dat die Gerwel-komitee einlik binne ‘n juridiese niet bestaan sonder enige amptelike invloed. Minister Asmal het hom al verskeie kere ten gunste van die verengelsing van Afrikaanse kampusse uitgespreek, en volgens hom geskied hierdie proses nie vinnig genoeg nie. Dít, in weerwil van die feit dat die uitskakeling van Afrikaans op baie kampusse teen ‘n onthutsende spoed plaasvind. Veral die Universiteit van Pretoria maak hom skuldig aan die blatante skending van studente se taalregte; studierigtings met meer as 80% Afrikaanstalige studente word sonder meer omgeskakel na Engels-medium sonder dat die studente hoegenaamd geraadpleeg word. Ook op ander kampusse waar die ongelukkige parallel- en dubbelmediumbenadering geld, pas dosente druk toe op studente om die “voorrreg” om in Afrikaans onderrig te word, op te sê. In lesingsale word daar blykbaar gevra, “Wie hier verstaan nie Engels nie?” Indien daar nie enige hande opgaan nie, word die betrokke lesingreeks voortaan in Engels aangebied.

Te midde van dit wat ons die taalkrisis aan hoër opvoedkundige instellings kan noem, en wat binnekort na die skole gaan uitbrei, sloer die Gerwel-komitee met sy werksaamhede en bevindings. Indien dit wel hoegenaamd vergader, geskied dit in die geheim, wat die indruk wek dat daar gekoukus word om Afrikaanse studente van hul taalregte te ontneem en bloot die situasie te ontlont sodat verengelsing ongehinderd kan voortgaan.

Indien laasgenoemde die geval is, was die suspisie dat die Gerwel-komitee bloot ‘n foefie was om aandag af te lei van die reële beleid van taalmoord wat op universiteite gevolg word, van die begin af gegrond.

Minister Asmal moet die intelligensie van Afrikaners mateloos onderskat indien hy van mening is dat hy hiermee gaan wegkom. Maar is dit nie ‘n probleem wat so oud is soos die Suid-Afrikaanse geskiedenis nie? Die neiging van sommige Engelssprekendes om te dink dat Afrikaners maar dom is, en maklik om die bos gelei kan word?

Broederbond en ANC

Vandeesweek was daar weer berigte dat die ‘n afvaardiging van die Broederbond, ofte wel die Afrikanerbond, onder leiding van prof. François Venter, samesprekinge met Minister Kader Asmal gevoer het oor “godsdiens en taal”.

In die verlede was daar ook al gerugte van geheime ontmoetings tussen die Broederbond en mnr. Mbeki waarin Afrikanerbelange ter sprake sou kom. Hierdie soort agterkamerpolitiek, wat natuurlik by uitstek die styl is van ‘n voorheen geheime organisasie, wek kommer.

Die indruk mag geskep word dat die Broederbond, ‘n onverkose liggaam, “namens Afrikaners en Afrikaans” praat. Dit mag ook voordelig wees vir die ANC om met ‘n groepie futlose en inskiklike mans te praat, eerder as om die brandende kwessies soos dié van taal, misdaad, plaasmoorde en diskriminasie teen jongmense in die arbeidsmark wat die meeste Afrikaners intens pla, aan te spreek.

Die absurditeit van sekere onlangse Broederbond-aksies, soos om geld uit die Christiaan de Wet-fonds beskikbaar te stel aan Umkhonto we Sizwe, die ANC se voormalige gewapende vleuel wat bietjie meer as tien jaar gelede nog deur die Pentagon as ‘n “terroriste-organisasie van beperkte doeltreffendheid” beskou is, wil dit laat voorkom asof die Broederbond na grashalms gryp in ‘n poging om witvoetjie te soek by die regerende party. ‘n Organisasie wat in vele opsigte reeds ver deur die tyd agterhaal is, en wat ‘n min of meer vergange Afrikaner-konserwatisme en –godsdienstigheid verteenwoordig, kan nie in die jaar 2001 optree asof dit namens Afrikanerdom praat nie.

Geen onverkose liggaam kan hom trouens so-iets aanmatig nie. Dit is ons oorwoë mening dat, indien die Broederbond hom ooit verkiesbaar sou stel om Afrikaners teenoor die huidige bewind te verteenwoordig, hy ‘n baie groot verrassing sal ontvang sover dit sy gewildheid by die breë gemeenskap, maar veral by die jonger geslag, betref. Daarom is dit onverkwiklik dat hierdie tipe ontmoetings tussen die Broederbond en die ANC steeds plaasvind. Die vermoede dat onaanvaarbare kompromieë aangaande Afrikaans en Afrikaners by sulke geleenthede bewimpel word, kan nie anders as om veld te wen nie.

boontoe

* * *

Markus Sadie aan Bareng Pooe oor "Hollandse Suid-Afrikaners"

Brief oorspronklik gerig aan The Sowetan, in antwoord op ‘n sterk Afrikanistiese stuk deur mnr. Bareng Pooe:

In reaksie op die xenofobie van Mnr. Bareng Pooe, wat Afrikaners as “Suid-Afrikaanse Hollanders” beskou, is dit algemene kennis dat ons oor geen ander vaderland beskik nie en en verskeie eeue in hierdie wêrelddeel deurgebring het. Die Hollanders haat ons, en beskou ons pragtige taal as “aardig”, daarom het ons min met hulle in gemeen. Trouens, die woord “Afrikaner” is vir die eerste keer in 1707 gebruik toe ‘n boorling gearresteer is deur Hollandse koloniale soldate.

Die idee dat ons taal die Oxford Engelse Woordeboek “besmet” het, soos mnr. Pooe aanvoer, toon ‘n lagwekkende onkunde oor die Engelse leksikon, wat uit 80% vreemde woorde bestaan, waarvan die meeste Franse woorde is wat Engels binnegekom het tydens die Noormanne se inval. Afrikaans het woord soos “trek”, “spoor”, “springbok” en baie ander bygedra tot Engels en ander groot Europese tale, en gegewe ons kreatitiwiteit en talent vir literêre uitdrukking, sal ons dit nog steeds doen in die eeue wat kom.

Die woord “Afrika” is eerste deur die Arabiere gebruik, en is daarom geen inheemse woord nie. Die opvatting dat net mense van die swart ras sou kwalifiseer om Afrikane genoem te word, is hoogs rassisties en laat die vraag ontstaan wie nou eintlik regtig “swart” is.

Die feit van die saak is dat Afrikaners en Afrikaans vandag onderdruk word deur die Xhosa-Engelse kliek wat hierdie land regeer en waarvan die korropte gewoontes elke dag in die koerante verskyn. Onder mnr. Saki Macozoma by Transnet, is Afrikaners verbied om hul taal in die werkplek te gebruik, terwyl hy honderde miljoene rande na ‘n Amerikaner gekanaliseer het.

Die vraag is wanneer ons almal gaan wakkerskrik om te sien dat ons land weer eens gekoloniseer word deur die Xhosa-Engelse kliek wat slegs begaan is daaroor om hulself ten koste van ons te verryk. Kultureel gesproke, is hulle comprador-Amerikaners wat plaaslike kulture minag en sou wou sien dat Suid-Afrika geherkoloniseer word as ‘n Angel-Saksiese staat. Mbeki wat in die Koningin se koets ry, spreek boekdele.

Ek lei af dat mnr. Pooe, in weerwil van sy rasse-geesdrif, van hierdie tipe is, en wat dolgelukkig sy McDonald’s gaan eet terwyl die inheemse tale en kulture van hierdie land ashoop toe gestuur word. Sy bewondering vir die korrupte diktator Mugabe wat die staatskas soos sy eie beursie aanwend, terwyl ons daardie ongelukkige land moet subsidieer met elektrisiteit en petrol teen krediet, sê veel aangaande mnr. Pooe se vermoë om enigiets behalwe sy eie velkleur raak te sien. In daardie sin is Afrikanisme bloot rassenarcisme, en niks anders nie.

Ten minste het ons Afrikaners ons eie kultuur, en nie net ‘n sin vir een of ander vae rasseband met ‘n gek soos Mugabe nie. Indien ek in Amsterdam sou afstap en aan die Hollanders sou vertel dat ek een van hulle is omdat ek hul velkeur deel, sou hulle my op die volgende vliegtuig uit die land sit as ‘n kranksinnige.

Markus Sadie

Randburg

boontoe

* * *

"U mag maar woon op ons grondgebied" - repliek van Bareng Pooe"

Geagte Sadie,

My waardering vir u antwoord hoewel onverwags aangesien my brief privaat gerig was aan die redakteur (dit is egter wel in die Sowetan gepubliseer – KRYT-redaksie).

Dit is jammer dat eposkommunikasie op sigself ‘n koue manier is om menings uit te ruil of aan debatte deel te neem. U sou ‘n ander taal praat indien u my geken het. Ek is ‘n Afrikaans (‘n ware een) met ‘n pragmatiese styl. Ek gee erkenning waar dit gepas is. My proaktiewe aard het my geleer om emosies na die kantlyn te skuif as mens kwessies soos dié debatteer. Ek bid vir die Allerhoogste dat us dinge presies op daardie manier sien, en op geen ander manier nie, want dit neig om fokus te verloor.

Ek is werklik nie Xenofobies nie. Ek wou net die feite regstel. Ek vergelyk die Xenofoob, soos u my noem, met die houding van ‘n gemeenskap wat toelaat dat misdadigers in hul midde floreer sonder om met die polisie saam te werk vir hul arrestasie. Ek het net bedoel dat, ons die Afrikane, niemand anders nie, moet ophou om uitlanders te help om ons te onderdruk. As ons akademici soos die Europeërs toelaat om vir ons geskiedenis te leer soos onder die ou apartheidsbewind (wat natuurlik ‘n produk van die Weste was), is ons gedoem.

Ek wil hê dat u ‘n Afrikaskrywer moet aanhaal om u punt te bewys. Moet asseblief nie Afrika-intellektuele siteer wat met hul monde vol kos praat nie. Ek wens dat ek my mening aan u kon uitdruk sonder om u seer te maak. Dit spyt my dat ek nie genoeg tyd en middele het om verder op dié punte in te gaan nie, andersins kon ek meer inliging gegee het om dit in perspektief te stel. Indien u belangstel, neem kennis van die volgende:

Die feit dat u eeue gelede hierheen gekom het, sal nooit u identiteit verander nie, u bly Hollands, maak nie saak hoe u taal beïnvloed is deur omgewingsaspekte nie. Ek is seker alle ander Europese uitlanders het eeue gelede na hierdie kontinent gekom maar ek moet nog een van hulle teëkom wat dit meer opeis as ons.
Geen land ter wêreld het twee verskillende nasies wat onder een naam bekend is nie, dit maak nie sin nie. Hoe kan ons Afrikane en Afrikaners in Suid-Afrika hê, vir u informasie beteken Afrikaner “Afrikaan” in Nederlands. Die jode het Palestynse grond in 1948 gesteel en ongelukkig stel hulle nie belang daarin om bekend te wees as Palestyne nie.

Europeërs het dit wat tans bekend staan as die VSA binnegeval en het gepoog om die “Rooi Indiane” te verdryf en ná jare van besetting is hulle nie naby daaraan om hulself “Rooi Indiane” te noem of selfs “Indiane” nie en hulle kan selfs gewelddadig raak as enigiemand durf waag om hulle “Indiane” te noem. Terloops wat het gebeur met hierdie arme Indiane?
Europeërs het gepoog om die inheemse Aborigineë uit te wis toe hulle hul land afgevat het maar ek hoor nie dat hulle hulself Aborigineë noem nie. Ons eie Britse Setlaars is nie gretig om hul trotse identiteit af te lê en Afrikane dood te maak vir hulle s’n nie, so waarom die Hollanders, wat maak hulle so spesiaal? Waarom moet ons die enigstes wees wie se identiteit ontken word wat aan ons grond gebonde is, net omdat sekere mense te lank hier vertoef het?
Die wêreld sal aanhou om langs rassegrense eerder as klassegrense verdeel te wees so lank as wat swart en wit hulself op dieselfde plek bevind. Arm swartmense strek altyd hul arms uit maar wat kry hulle in ruil daarvoor? Dit is waarom wittes geraas maak oor President Robert Mugabe en swares simpatiek teenoor hom is, dit is waarom swartes Saddam Hussein sal ondersteun en wittes ‘n lawaai sal opskop, dit waarom wittes sal aanhou om rassistiese krieket- rugbysport te ondersteun en swartmense allesinsluitende sokker. Waarom dink u Hansie is tot aan die einde ondersteun deur wittes terwyl swartes gedink het hy behoort te betaal vir sy sondes, waarom dink u gedra wit regters hulle op so ‘n manier selfs in vandag se tye? Die intelligente Madeleine Albright het soos ‘n amateur gelyk toe sy vrae moes beantwoord tydens ‘n internasionale konferensie oor hulle totale aanslag teen die mense van Irak. Die Almagtige het ons die geleentheid gegee om vreedsaam naas mekaar te bestaan in verskeidenheid, daarom sal Afrikane steeds daardie hand van vriendskap uitsteek. Het u geweet dat die glibberige jong Mandela deur die FBI vasgetrek is in Natal?

Aanvaar asseblief dat u argument geensins oortuig nie, nêrens onder die son nie. Net mense soos u wat weier om die lig te sien selfs ná die eerste sonsverduistering van die milennium. Waarom het u hierdie taal van u in ons keelgate afgedruk met wapengeweld? Om eerlik teenoor u te wees, u taal is in dieselfde poel as “Fanagalo” wat in die myne deur mense met verskillende agtergronde gepraat word om met mekaar te kommunikeer, en ek sal die eerste en die laaste wees om nie saam te stem as voorstelle gemaak word om dit te verander na “Afrikalo” of iets in dier voege.

In die Koningin se taal sê hulle, “Self-praising has got no recommendation”. Ons sal die beste mense wees om onsself die korrekte name te gee, nie Europeërs nie. Dit wil voorkom asof alles op aarde aan Europeërs belowe is omdat hulle oor ekonomiese mag beskik het en hulle met wapengeweld “beskawing” op ons afgedwing het.
Ons Afrikane sal steeds saam met u woon op ons grond selfs al het u voorvaders u weggedryf van u oorspronklike grondgebied. In elk geval lyk dit asof almal Afrika toe kom as hulle nie meer hul eie speelgrond het nie.
Kyk ‘n bietjie na die wonderlike voorbeeld wat Afro-Amerikaners stel. Hulle het uiteindelik agtergekom dat hulle bekend moet wees onder hul plek van oorsprong. Die waarheid kom altyd na vore. Selfs vroue oor die hele wêreld wil hul nooiensvanne behou. Dit is globalisering in die ware sin van die woord, so kom ons wees deel van die internasionale gemeenskap in alle opsigte.

Ek hoop en vertrou dat u my reaksie so insiggewend en onaanvegbaar as moontlik sal vind. Dankie.

Bareng Pooe

boontoe

* * *

"Afrikane kan leer van Afrikaners" - Sadie aan Pooe

Geagte mnr. Pooe,

Dankie vir u breedvoerige anwoord op my brief. Ek is nie seker of die Sowetan my repliek geplaas het nie, waarskynlik omdat dit ‘n dissonante toon aanslaan binne die omgewing van Afrikanisme wat blykbaar uitgaan van die bladsye van dié koerant. Soos uself, glo ek in die waarde van vrye meningsuiting en die oop gesprek, en laat ons nie as Afrikane hierdie opvattinge verwerp as synde Eurosentries nie, en terug te voer na die ou Griekse demokrasie van Athene.

Vergun my dus om te antwoord op u punte.

Dit is nie waar om te sê dat Afrikaners ooit hul taal in enigiemand se keel met wapengeweld afgedruk het nie, aangesien die poging van mnr. Treurnicht om Sowetane oor te haal om wiskunde in Afrikaans te studeer nooit gematerialiseer het nie en laat vaar is nog voor enigeen sy driemaal-tafel in Afrikaans kon opsê. Aan die ander kant, sedert hul koms in 1806, het die Engelse in hierdie land nog nooit opgehou op hul taal in almal se keelgate af te druk nie, of dit nou in die kampe was of elders, en sekere mense wat u Afrikane noem, maar wat slegs Britte met swart velle is, het onlangs begin om dieselfde te doen. ‘n Arm Afrikaner wat by Transnet gewerk het, mnr. Lukas Rautenbach, is verbied om sy taal by sy werk te praat in 1998, selfs teenoor Afrikaanssprekende kollegas en kliënte, deur sy ryk swart base wat sedertdien ontmasker is omdat hulle honderde miljoene rande weggegee het aan ‘n Amerikaner, mnr. Coleman Andrews. As gevolg hiervan het Rautenbach sy werk verloor, en toe hy ‘n klein afleweringsbesigheid begin het om te kan oorleef, is hy gedood deur twee rowers terwyl hy besig was om kruideniersware af te lewer aan ‘n supermark in ‘n swart woonbuurt.

Op hierdie oomblik word die Afrikaanse universiteite verengels deur ‘n koloniale Indiër, mnr. Kader Asmal, wat geen ander taal praat behalwe Engels nie en wat 27 jaar buite Suid-Afrika deurgebring het. Hy het dreigemente teenoor die Afrikaanse gemeenskap gemaak wat, indien hulle in 1976 in Soweto geuiter sou gewees het, nie net tot die afbrand van skole en biersale sou gely het nie, maar waarskynlik tot die vernietiging van die hele Johannesburg. Kulturele imperialisme gedy in Suid-Afrika, en marsjeer steesds voort op die deuntjie van God Save the Queen.

Ek is bevrees ek staan baie skepties oor die warm lug rondom die Afrika-renaissance, ens. Die enigste verskil tussen Mbeki en die gemiddelde inwoner van Groot Brittanje is dat laasgenoemde die moltrein neem en eersgenoemde oor ‘n R600 miljoen-vliegtuig beskik; kultureel behoort hulle tot dieselfde groep. Hierdie land word onderwerp aan ekonomiese Thatcherisme, en word veramerikaniseer en gekoloniseer teen ‘n tempo wat selfs nie eens Lord Milner kon regkry ná die Anglo-Boereoorlog nie.

Onthou ons dus van die moralisme oor “ons arm Afrikane met uitgestrekte hande”. Elke dag sit ek in die Gauteng-verkeer, en ek sien meer en meer “arm Afrikane” wat S-klas-Mercedesse bestuur, terwyl ek jong Afrikaners ken met matriek en ‘n goeie punt in wiskunde wat vir R900 per maand werk, vir kos moet bedel van vriende en familie, omdat hulle nie in diens geneem kan word nie as gevolg van hul ras en hulle daarom uitgebuit word deur vele werkgewers.

Dit wat die algemene kwessies betref. Laat my nou terugkeer na u spesifieke argumente.

1. Ek het nie hierheen “gekom” nie, ek is hier gebore. Opnames bewys dat Afrikaners die sterkste identiteit het van alle etniese groepe wat in Suid-Afrika woon, wat gevorm is in twee oorloë teen die Britte, asook in hul stryd teen intense armoede in die eerste helfte van die twintigste eeu. Ons beskik oor die voortreflikste literêre kultuur in Afrika, ons eie skole, en tot onlangs, ons eie universiteite waar hierdie kultuur oorgedra is van een geslag na ‘n volgende. Ons identiteit is definitief gevorm deur ons omgewing, ons geskiedenis, en bo alles, ons eie skeppingsaktiwiteit in hierdie land. Tans poog hierdie kolonialistiese, kwasi-Britse regering om ons taal uit te wis, sowel as ander aspekte van ons identiteit ten einde ons as ‘n volk uit te wis, om ons te intgreer in die pan-Afrikaanse droom wat maar net ‘n ander weergawe is van Rhodes se Kaap-tot-Kaïro-fantasie. Die swart Britte wil Afrika rooi verf, net soos die ou Britse imperialiste.

2. Ek is nie seker wat die woord “Afrikaan” beteken nie, aangesien dit eerste gebruik is deur die Arabiere, soos ek reeds gesê het, en dit kan vandag deur enigeen gebruik word om na homself te verwys, ingesluit die Arabiere van die Maghreb, Europeërs in vele dele van Afrika, sowel as die sprekers van Afrika se tweeduisend tale wat geweldig verskil in kultuur en gebruike. Die feit dat swartmense met ‘n Angel-Saksiese kultuur in die VSA na hulself as “Afro-Amerikaners” verwys, toon hoe absurd hierdie term eintlik is. Die opvatting van ‘n Afrikaner, aan die ander kant, het ‘n besliste betekenis, wat wyd erken word selfs deur ons vyande, en dui op ‘n nasionale minderheid in Suid-Afrika wat tans sonder ‘n staat is. Die grap is dat elke etniese groep onder apartheid ‘n tuisland ontvang het, behalwe die Afrikaners. Indien ons maar ‘n Transkei, ‘n Ciskei of selfs ‘n Gazankulu gehad het, sou dit nou ‘n paradys gewees het waar ons ons taal kon praat sonder inmenging van ‘n Kader Asmal of ‘n Penuell Maduna, en ons belastings sou op onsself bestee gewees het pleks van op ons landgenote wat ons meesal minag en ons ons teenwoordigheid hier verwens, soos wat u brief grootliks demonstreer.

3. Ek is geen liefhebber van die Amerikaners nie, anders as ons huidige regering wat elke Amerikaanse modegier navolg sodat ons almal McDonald’s sal eet en Coca-Cola sal drink en vergeet dat ons ons eie tale, kookkuns, uitdrukkings, lewenswyse, ens., gehad het. Ja, die Amerikaners het die sogenaamde Indiane uitgewis, terwyl in hierdie land binne net 100 jaar met Afrikaners in die regering die swart bevolking aangegroei het van net onder 2 miljoen in 1900 tot oor die 30 miljoen vandag, alhoewel vele mense in die wêreld, veral Amerikaners, apartheid met volksmoord gelykstel.

4. Sien die vorige punt vir ‘n antwoord op hierdie 4. Afrikaners word meesal beskou as “primitief” en “agterlik” deur Europeërs en Amerikaners, alhoewel ons beter skole, ‘n hoër matriekslaagsyfer as hulle het en vir ‘n klein volk ‘n hoogs gesofistikeerde en geletterde kultuur. Die Britte het ons beskou as net nog ‘n soort “naturel” wat uitgewis moes word soos hulle aan ons vroue en kinders gedoen het in hulle kampe. Hulle het gedink dat ons “gekorrup” is deur die Afrikakontinent, en soos De Kiewiet sê in sy History of South Africa, verwysende na die Boere, “die merk van nomadisme was op hulle”.

5. Ek vind u soort rassefatalisme nogal kommerwekkend. Waarom moet die wêreld volgens rassegrense verdeel? Die huidige bewind het sy sy bewondering vir die teorieë van ‘n negentiende-eeuse Duitse intellektueel, sowel as sy daaropvolgende Russiese dissipels, verruil vir ‘n geloog in wat hulle noem “transformasie”. Die groot sonde van Afrikaners was dat hulle die ander Afrikane (wat al hoe minder Afrikaans en meer Amerikaans word by die dag) wou leer dat, om kolonialisme teen te gaan moet mens jouself ophef met jou eie middele, jou kultuur en taal moderniseer, moedertaalonderrig beoefen, ens., maar hierdie boodskap is verlore op hulle. Die sirenegesang van “wees soos ons, wees Engels, ry saam met die Koningin” was sterker. Noudat hul enige sin van hul eie identiteit verloor het, bevind die swart élite hul in ‘n hibriede toestand, verward, en met ‘n dreigende identiteitskrisis, en al wat dit byderhand het is sy onnosele opvattinge van ‘n rasseband wat alle donker mense saambind. Sonder die vermoë om oorspronklik te dink, kyk hulle na Amerika en die suwwe teorieë van W.B. Dubois – wat, terloops, so naby daaraan was om Frans te wees en Europees as wat sommige kleurlinge daaraan is om Afrikaners te wees – wat eerste die terms “Afrika-renaissance” gebruik het in 1904. Ons rasserevolusie sal, soos Microsoft Windows, die stempel van “Made in America” dra.

6. Sien my opmerkings aan die begin aangaande die “gedwing met wapengeweld”, wat ‘n mite is. As Afrikaans soos Fanagalo is, dan moet Engels eintlik Frans wees wat 80% van sy woordeskat aan laasgenoemde taal ontleen. Al word Afrikaans gepraat deur net 5,5 miljoen mense as moedertaal, het dit ‘n wetenskaplike, tegnologiese leksikon ontwikkel, om nie te vergeet van ‘n poësieskat wat vele groter Europese tale in die skadu stel. ‘n Mens kan Heidegger in Afrikaans bespreek, sowel as ‘n satelliet in ‘n wentelbaan stuur, soos wat by die Universiteit van Stellenbosch gedoen is, nie so lank gelede nie, alles in Afrikaans, wat ver verwyderd is van “gee my die graaf” of “maak vol die koekepan”. Dit toon net aan hoe Brits en anglosentries u reeds is, deur Afrikaans te probeer afkraak.

7. Alle volke, of hulle nou Europees, van Afrika, Oosters, of Arabies is, het deur die eeue oorlog gemaak. Europeërs het dit net meer suksesvol gedoen, omdat die Renaissance vir hulle wetenskap en tegnologie gegee het om oorloë te wen teen die inwoners van ander kontinente, asook mekaar op groot skaal dood te maak tydens twee Wêreldoorloë. Dit maak hulle nie meer of minder boos as enigiemand anders nie. Niemand kan egter die voordele ontken wat ‘n rasionele begrip van die wêreld vir die hele mensdom gebring het nie, voortuitgang in medisyne, wetenskap, tegnologie, en someer. Dink aan Leibniz se calculus as u volgende keer oor ‘n betonbrug ry.

8. Ag, dankie, ek voel gevlei. Die punt is egter dat dié nie u grondgebied is nie, wat u godsdienstige oortuigings ook al mag wees. Toe die Boere oor die berge gekom het, was die plek so te sê leeg, daar was so min mense. Swartmense in Suid-Afrik het ook van elders gekom, uit die Niger-Kongo-gebied soos wat hul tale aandui, en hulle het die KhoiSan van hul voorvaders se grondgebied verdryf. Afrikaans het vele KhoiSan-woorde opgeneem, en kan as die ware moderne erfgenaam van hierdie antieke nomadiese kultuur beskou word (vgl. ook De Kiewiet se opmerkings oor die nomadiese aard van die Trekboerkultuur in die agtiende eeu). Afrikaners het Afrika se enigste ontwikkelde landbounywerheid gevestig in ‘n baie droë land; ongeveer 30 000 van hulle produseer voedsel vir 40 miljoen mense sonder enige regeringsubsidie, anders as die Europeërs en Amerikaners. Nietemin word hulle vermoor teen ‘n angswekkende tempo, en een uit elke agt is in die laast paar jaar aangeval, wat meer as 1000 sterftes tot gevolg gehad het, en meer as 6 000 beserings.

9. Afro-Amerikaners is die slegste voorbeeld wat enigeen kan navolg. Meer as 50% van hulle leef op een of ander vorm van staatsubsidie, sogenaamde “welfare”, ens. Hulle beskik oor ‘n kultuur van geweld, dwelms, enkelouerskap, “julle skuld ons”, en is ‘n werklik verplaasde groep mense wat hul kultuur van oorsprong verloor het. Die ironie is dat onder the huidige regering die verskeie groepe in Suid-Afrika wat kon aanspraak maak op ‘n eie kultuur, binnekort tot dieselfde toestand gereduseer gaan word, sonder dat hulle ooit ‘n slaweskip hoef te haal.

Eendag sal u nog na Afrikaners kyk en vra, hoe het hulle dit reggekry om die Empaaier van hulle af te skud? Maar teen daardie tyd sal dit waarskynlik te laat wees.

Markus Sadie

boontoe

* * *

Wittes het God gesteel, sê Gautengse oud-premier

Die vorige premier van Gauteng, mnr. Mathole Motshekga, is van mening dat witmense God van Afrikane “gesteel het”. Die naam van hierdie god is Abakara, en die Grieke, Romeine en Jode het hul idee van ‘n godheid wederregtelik van Afrikane geneem. Afrika, en nie die Weste nie, is die "baarmoeder van die beskawing". Trouens, hy sê dat daar nie so iets soos ‘n Westerse beskawing bestaan nie, want dit kom neer op 'n oksimoron.

Mnr. Motshekga is tans hoof van die Kara Erfenisinstituut in Pretoria. Hy versprei sy idees aangaande die Afrika-oorsprong van beskawing en van godsdiens aan studente by technikons en universiteite. Volgens hom kan ware bevryding net plaasvind wanneer Afrikane terugkeer na ‘n outochtone godsdiensbeoefening wat gesuiwer is van Westerse invloed.

“Witmense het vir ons besluit wat ons moet liefhê, haat en in glo. Solank as wat ons deurdrenk bly van wat hulle vir ons ontwerp het as reg om in te glo, sal ons nooit die trotse mense wees wat ons eers was nie,” het hy in ‘n onderhoud met die Johannesburgse koerant, The Sowetan on Sunday, gesê.

Mnr. Motshekga se siening van ‘n Afrikakultuur wat kan aanspraak maak op vroeër kennis- en godsdiensvorme as dié van die Weste, en wat geen erkenning daarvoor geniet nie, is tipies van die denke van die Afrika-renaissance. Dit vind sterk aansluiting by gedagtes wat deur swartmense in Amerika geformuleer is, en wat bekend staan as “afrosentrisme”. In terme hiervan was Aristoteles en die meeste Griekse denkers bloot na-apers wat die idees van groter Afrika-denkers geplagiariseer het.

Mnr. Motshekga spits hom veral toe op die geskiedenis van godsdienste. Volgens hom behoort Afrikane te besef dat bestaande Westers-geïnspireerde godsdienste gebruik is om slawerny, kolonialisme en blanke heerskappy te regverdig. Daarom behoort Afrikane terug te gaan na die suiwerste vorm van hul godsdiens soos dit deur hul voorvaders beoefen is, voordat dit deur Westerlinge gesteel en oorgeneem is.

Die tien Joodse patriarge in die Bybel is volgens Motshekga gemodelleer op Afrikapatriarge wat hemelse wesens was en ooreenstem met die tien planete. Die Afrika-Noag se naam was Hara of Hampta, wat “son” beteken. “Die verskil tussen die twee is dat die Afrika-figure hemelse wesens was terwyl die Joodses aardwesens was.

Selfs die Christelike drie-eenheid is van antieke Afrika-filosofie gesteel en word aan die Romeine toegeskryf, volgens Motshekga. Afrikane het die drie genoem: Usara, wat die Romeine na Osiris verander het, Mari of Maria wat Isis geword het en Kara (Jesus) wat omvorm is na Horus. Anders as Jesus Christus, wie se dood en wederopstanding gemodelleer is op dié van Serapis, was Kara ‘n hemelse wese. Volgens Motshekga “beteken dit dat diegene wat Christus as die seun van God beskou en voor hom bid eintlik buig voor ‘n mens en nie voor iemand met hemelse magte nie”.

Ook godsdienstige vakansiedae soos 25 Desember is oorgeneem van Afrikane. Beide Jesus en Moses is deur die Afrika-oudstes onderrig in die Kara-Akademies van Ethiopië en Egipte. Die dissipel Markus is weer deur ‘n Afrika-wysgeer by name Ranose onderrig. Tussen 312 en 480 n.C. is ‘n essensieel Afrikanistiese Chistendom verkorrup tot Katolisisme. Selfs Sint-Augustinus was ‘n Afrikaan. Hy en die Romein Plotinus was dissipels van die antieke wysgeer Ammonius Sakka.

Die twaalf sterretekens, die twaalf stamme van Israel, asook die ster van Dawid, is alles uitvindsels van die Afrikane wat agterna deur ander as hul eie aangebied is. Volgens Matshekga is dit ‘n leuen dat Afrika oor geen geskrewe geskiedenis beskik nie, want “Afrika se geskiedenis kan na die hemelliggame teruggevoer word, en indien Afrika bo alle twyfel die wieg van die mens is, is dit die wieg van godsdiens ook.”

Baie plekname in Afrika kan teruggevoer word na sterrekundige name. So byvoorbeeld is die woord Magaliesberg afkomstig van die Sjonawoord Mwari, wat “God” beteken, en terug te voer is na Mari of Maria in die Afrika-drie-eenheid.

Toe mnr. Motshekga as premier vir Gauteng opgetree het, het hy gevoel dat sy kennis verwaarloos is. Hy beskou die oordra van inheemse kennisstelsels, iets wat ook befonds word deur die Wetenskaplike en Nywerheidsnavorsingsraad (W.N.N.R.) as ‘n belangrike taak ten einde die idee aan Afrikane oor te dra dat dit hulle kennis was wat die wêreld geskep het, en niemand anders s’n nie.

Die disinformasie oor kennis is ‘n groot tragedie. Mnr. Motshekga is van mening dat Afrikane moet ophou om mense te aanbid en eerder hulle god, Abakara, die onkenbare, behoort aan te hang. “Dit is waar Afrika se heil lê,” sê hy.

boontoe

* * *