Cassie Aucamp

Cassie Aucamp, 03/02/2002: Kunsmatige skeiding is dood in die pot

Jennie,

Hierdie kunsmatige skeiding tussen Afrikaners en Boere-Afrikaners is die dood in die pot vir dit wat vir ons kosbaar is. Tipiese voorbeeld is juis jou reaksie op Dan se verklaring, waaruit nou 'n debatstryd oor Afrikaners/Boere ontstaan, en die fokus afgelei word van die stryd wat ons moet stry teen die nuwe ANC-imperialisme soos geopenbaar in die obsessie oor Afrikaanse plekname.

Daar is derduisende Afrikaners wie se hart voluit klop vir die Afrikanersaak, vir ons belange, vir ons regte, maar wat gewoon nie na hulself as Boere-Afrikaners verwys nie. Ons moet pasop dat ons nie 'n begrip met 'n kosbare historiese konnotasie misbruik om ons kragte nog verder te verdeel nie. Ons moet agting hê vir ons geskiedenis, ook vir die Boere-identiteit van hulle wat ons met groot eer voorgegaan het. Om die term egter vandag af te forseer op alle Afrikaners is kunsmatig en verswak eenvoudig ons kragte. Dit is 'n term wat baie moeilik afgaan by goeie en lojale Afrikaners wat nog dink melk word in 'n fabriek gemaak!

Dit is jou volste reg om jouself 'n Boere-Afrikaner te noem. Om dit eter af te dwing op ander of die blote term as sjibbolet te gebruik vir ware Afrikanerwees, is verdelend en kontra-produktief. Ek wil ook nog sien hoe ons ooit regte gaan afdwing vir twee afsonderlike groepe: Afrikaners en Boere-Afrikaners.

Natuurlik is meesal na mense soos Piet Potgieter as Boere verwys, en was dit ook in daardie tyd 'n selfaanduiding van hul indentiteit. Intussen het die geskiedenis verloop, het die oorgrote meerderheid Afrikaners stedelinge geword, en het die term Afrikaner wêreldwyd die aanduiding geword vir hierdie een volk wat gekenmerk word deur 'n gemeenskaplike identiteit, taal, kultuur, geloof en geskiedenis.

As jy dan konsekwent wil wees moet ons vandag nog na onsself verwys as Vryburgers of selfs Koloniste (vgl. Adam Tas se stryd teen die amptenare). Met die tyd verander terminologie om by veranderde gebruik en omstandighede aan te pas. Dan word dit 'n doodnormale taalverskynsel om nuwe terminologie ook retrospektief toe te pas wanneer jy met die geskiedenis omgaan. Dus was bv. Piet Potgieter, net soos ek en jy, in alle opsigte wat vandag wêreldwyd as 'n Afrikaner bekendstaan.