Die aankondiging deur prof. Chris Brink dat Stellenbosch na dubbelmedium oorskakel, lui die doodsklok vir Afrikaans as onderrigmedium, nie net aan dié universiteit nie, maar uiteindelik ook aan hoër- en laerskole.

Die model wat Brink volg, is presies dieselfde as wat Johan van Zyl enkele jare gelede by Tukkies ingestel het: verkondig die "behoud van Afrikaans" en "meertaligheid" terwyl Engels op elke klas afgedwing word. Hierna doen die wette van die sosiolinguistiek hul werk en die "killer language" soos taalkundiges dit noem, neem oor.

Tukkies beskik steeds oor die grootste aantal Afrikaanssprekende studente van enige universiteit in die land, maar die meeste tegniese vakgebiede is reeds "English only". Die studente het onlangs tevergeefs op hul T-hemde en plakkate geskryf, "English only is erger as slegs blankes", maar niemand het daarop ag geslaan nie.

Dit ly geen twyfel dat Stellenbosch op die glybaan na verengelsing geplaas word nie. Sover ek verneem, is die ANC-jeugliga reeds bedrywig op die kampus en sal daar gesorg word dat aggressiewe Engelstalige studente oor die volgende paar jaar inskryf wat soos by Tukkies gratis sal studeer met beurse wat deur die betalende Afrikaanstalige studente gefinansier sal word, want daar is mos behoefte aan groter "diversiteit", studente uit ander Afrikalande, en dergelike meer. Een student uit Ghana wat nie Afrikaans verstaan nie, sal 'n klas na Engels laat oorslaan, net soos aan die UP die geval was by tandheelkunde en ander fakulteite.

Ook die taalmedium aan Potch is besig om ná die onlangse samesmelting met swart kampusse sterk onder skoot te kom. Hoewel die hoofkampus van Potch steeds by verre die mees Afrikaanse kampus in die land is, het Kader Asmal gesorg dat hy 'n radikale politieke raad oor die universiteit aanstel wat geen steen onaangeroer sal laat om die universiteit volledig te verengels en te verafrikaniseer nie.

Die situasie lyk dus bedroewend, maar ons moenie tou opgooi nie. Mense soos prof. Chris Brink sal egter moet besef dat hulle besig is om met die toekoms van ons taal te dobbel met hul politiek korrekte speletjies en retoriek oor "meertaligheid" waarin niemand glo nie, allermins die huidige bewind en sy akademiese meelopers.

Blykbaar word kunsstudente aan Stellenbosch reeds gedwing om alle take in Engels te skryf en word diegene wat vir Afrikaans probeer voorspraak maak, geviktimiseer. Die metodes wat reeds suksesvol by ander kampusse soos Tukkies toegepas is, stoomroller dus voort.

Die Randse Afrikaanse Universiteit heet reeds "Johannesburg University". Wat sal Stellenbosch se "getransformeerde" naam wees? The Bram Fischer University?