Die Afrikaanse Pers weet skynbaar nie hoe om MBeki te benader nie.  
Ek lees onlangs iets deur Anesca Smith in Rapport wat verskeie mense 
aanhaal wat MBeki se Kersfeesboodskap glo "bemoedigend" vind.  So 
byvoorbeeld haal sy Fanie du Toit van die Instituut van Geregtigheid 
en Versoening aan, wat sê dat bookskappe soos MBeki s'n verwelkom 
moet word.

Wat het MBeki gesê?  Glo die volgende:  "Suid-Afrika behoort aan ons 
almal - wit en swart. Ons moet nie die verlede vergeet nie, maar kan 
ook nie toelaat dat dit ons gevange hou nie." 

Max du Preez het so 'n weggooireël in sy Dakar-relaas in Insig, waar 
hy vra wat van die MBeki wat hy in Dakar ontmoet het geword het.  
Die hedendaagse MBeki is glo nie meer so vriendelik teenoor 
Afrikaners nie.

En nou sê MBeki in Soedan dat "Neither South Africa nor Sudan have 
yet been able to establish societies acceptable to all their people."

Wat sou "acceptable" vir die ANC wees?  Definitief 'n land waar 
swart in beheer is, en waar wit nie juis 'n faktor is nie.

MBeki se probleem is om die "acceptable" status te bereik sonder om 
te veel onstabiliteit te veroorsaak.  Daarom moet hy Afrikaners ten 
minste vir die volgende dekade of so gelukkig hou.

Dit is duidelik dat MBeki gemengde boodskappe na Afrikaners stuur.  
As hy met Afrikaners praat, dan smeer hy hulle heuning om die mond: 
ons hoor dat [Afrikaners het 'n plek in SA, Afrikaans is 'n mooi 
taal, daar is 'n toekoms vir Afrikaners, BEE en AA is nie daar om 
Afrikaners te benadeel nie, ... ens.]  En Afrikaners is sulke 
suckers dat hulle daardie heuning gulsig aflek.

En as hy met Soedanese praat, dat is dit dat SA nog nie aanvaarbaar 
is nie, en as hy ongedissiplineerd is, dan val die masker af en 
praat hy van "settlers" wat SA nog nie vinnig genoeg verlaat nie.

Intussen hang die Afrikaanse pers aan elke woord van MBeki:  Wat sê 
hy dié keer?  Is dit positief of negatief?  Hoe interpreteer ons 
dit?  Wat van die toekoms?

Intussen kom die toekoms onverbiddelik nader, en is die ANC en MBeki 
onverbiddelik besig om hulle agenda in te stel.  

Daardie agenda hou geensins verband met wat MBeki sê nie.  En jy kan 
uitvind wat die agenda is deur na wetgewing te kyk wat die ANC reeds 
ingestel het, beplan om in te stel, en beplan. 

En intussen is nog 'n Boer dood en sy vrou beseer nadat hulle met 
grawe aangeval is, en is daar nog Afrikaners wat MBeki se Kersfeesboodskap bemoedigend vind.

Buks van Rensburg