Roodt skiet
intellektueel tekort
'n Oningeligte
"Matie-ouer" skryf in die briewekolom van 04/10/2005 in
Die Burger (Kunste
is eentalig Engels) dat die (verkeerdelike)
"Beeldende Kunste" Departement "slegs in
Engels" doseer. Die dag na die verskyning van die brief loods
Dan Roodt in sy kapasiteit as iemand wat baie lank terug dié
"Matie-ouer" ontmoet het, 'n persoonlike aanval teen die
Visuele Kunste Departementshoof, prof Sandra Klopper. Met sy
inherente onvermoë om rasioneel te dink stuur Roodt die aanval in
e-posformaat aan haar, Chris Brink, aan myself en aan die hele
(heelwaarskynlik beperkte) "praagmedialys".
Dit is nie die eerste keer dat Roodt 'n persoonlike aanval loods
teen 'n vrou aan ons universiteit nie. Hy herbevestig vir homself
sy manlikheid hierdeur, of moet ek eerder sê sy tekortkominge
daarvan. Deur onder andere Marlene van Niekerk vroekr vanjaar 'n
"kugel" te noem het hy veroorsaak dat Dorothea van Zyl
se Woordfees vanjaar nasionale publisiteit ontvang het. As
gebrandmerkte rassis het sy deelname aan die Woordfees gelukkig
geen skade daaraan gedoen nie, inteendeel meer mense weet nou van
dié inklusiewe fees. Dalk juis om hierdie rede probeer hy nou nog
'n gewaardeerde vrou met chauvinisme oordonder omdat hy nie
instaat daartoe is om op enige ander manier 'n stawende argument
oor enigiets te maak nie. Roodt gryp na sy biologiese omdat sy
intellektuele kortkom.
As derdejaar in 'n multidissiplinêre kursus het ek al met talle
fakulteite aan hierdie universiteit te doen gekry, elkeen met sy
eie interpretasie van ons taalbeleid. Vanjaar het ek vir die
eerste keer met die Visuele Kunste Departement te doen gekry.
Klopper, wat vir my Kunsgeskiedenis 1 doseer, is Afrikaans en
Engels magtig en het haar klasse van die begin af in Afrikaans
aangebied. Weens die oorgrote Engelse studente wat tydens lesings
gekla het, ook weens kunsterminologie, het sy meer as enige ander
dosent by wie ek die afgelope 3 jaar klas gehad het, haar lesings
volgens die vereistes van die T-opsie gehandhaaf. Ten spyte van
haar titel dring sy daarop aan dat kollegas in studente haar
Sandra noem. Daar is werklik nie nog 'n departementshoof of dosent
soos sy nie. Sy doen geweldig baie moeite om eksklusiewe Engelse
kunsterme so breedvoerig as moontlik in Afrikaans te verduidelik,
nie net deur dit bloot te vertaal nie maar ook deur senior
studente te kry om dit vir eerstejaars te
kom verduidelik. Sy wend ook geweldig baie multimedia aan om die
terminologie verstaanbaar te maak vir Afrikaanssprekende-studente.
In sy e-pos
aan Klopper, ek bedoel Sandra, noem Roodt dat 'n "Eerste Wêreld-Afrikaanse
universiteit soos Stellenbosch" nie nodig het om enige kennis
te dra van die kuns van "Afrikane" nie. Dit hoort
"veel eerder ... aan 'n universiteit elders ... in
Dar-es-Salaam of Kampala". Ek neem aan Roodt wil hê Sandra
moet slegs Europese (Engelse) kuns in Afrikaans doseer, dat die
kuns van Pierneef, Irma Stern, Willie Bester en ander
Afrikaanssprekende kunstenaars wat tans aan dieselfde departement
doseer (soos Anton Kannemeyer) irrelevant is.
As Eurosentriese Afrikaan sal Roodt se skryf(kuns), soos hy
regmatig in sy e-pos sê, van veel meer belang wees "in
Dar-es-Salaam of Kampala" waar hulle saam kan lag daaroor.
Meneer Roodt, soos jy dit aan Sandra in jou e-pos stel, wil ik
voorstel "dat u ernstig [moet] besin oor waarmee u besig
is" aangesien nie eens 'n afbeelding van Duchamp se urinaal
plek het daarvoor nie.
Andri--Pierre du Plessis
Hoofredakteur | Editor-In-Chief
Die Matie Studentekoerant | Student Paper
Langenhoven Studentesentrum
Universiteit van Stellenbosch
Privaatsak X1
Matieland 7602
Republic of South Africa
boontoe
