Ons het keuse om te emigreer

Dit was met tipiese vooropgelegde idees dat ek Daniël Roodt se brief aan "Mad Max" Ek is nie van Engelse afkoms - vir Max du Preez gelees het. My persepsies oor jou het verander, en ek dink jy het uiters goeie standpunte, wat Max nie kan of wil beantwoord nie. Maar in elk geval.

Ek is 'n wit Afrikaanse landbouer (boer) van Engelse herkoms, met nie naastenby die intellektuele vermoëns van jou of Max nie.

Alhoewel ek saamstem met baie van jou standpunte, voel ek tog Daniël, dat in die tye waarin ons vandag leef met paspoorte en vliegtuie, ons die keuse het in watter dam saam met watter visse ons wil swem. As die ander inwoners van die dam jou irriteer en die baas 'n brulpadda met die I.K. van 'n revierklip is, vat jouself weg man, moenie vir jou 'n hoekie van stilte gaan soek nie, daar is nie een nie.

As jy dan eerder Duits of Frans wil hoor as Xhosa of Sotho, moenie verder jou moer versuur nie, gaan daar waar jy weg is van daardie geluide. Miskien is dit makliker vir ons dommer Afrikaners om tot laer vlakke van intellektuele kommunikasie te daal as vir manne van jou formaat. Ek het in Afrika geleer om myself nie te ernstig op te neem nie. Ek dink nie jou groot probleem is die groot swart probleem nie, ek dink jy is gatvol omdat jy as Afrikaner nie meer jou sin kan kry "en die shots call" nie.

Ek weet nie Daniël, politici was nog altyd die probleem en nie die oplossing nie. Maak die sweer van binne gesond. Sorteer jou probleem met jou buurman uit sonder om persoonlik te raak, bou op deur jou hande 'n slag vuil te maak met grond en nie ink nie, moenie die een verruil vir die ander nie, kry 'n balans. Vergeet van wat die Europese filosowe geskryf het, en help probleme met dade oplos, nie met opinies nie.

Jy sal nie jou kultuur verloor deur met die ander "Smarties" in die pakkie te meng nie, jy sal 'n rooi Smartie bly. Of jou kleinkinders rooi smarties gaan bly, hang van jou kinders af en nie van jou nie, daar is in elk geval 'n Saraha Baartman in jou voorgeslagte.

Ontspan en help saamwerk, of vat jou paai en waai.

Guy Emslie