NSA 'n
vriendelike ervaring
Ek deel graag
hierdie ervaring met julle. Vir die eerste keer in my lewe noop
omstandighede my om 'n toeris te wees in my eie Vaderland. Sonder om
te veel uit te wy oor hoe dit gebeur het, behalwe om te sê Iberia
lugdiens, as ambassadeur van Spanje, het my siening omtrent die
Spanjaarde en hulle standaarde 'n geweldige knou toegedien en gesorg
dat ek op verskeie lughawens insluitend JHB internasionaal gestrand
gelaat is sonder verblyf en sonder konneksie vlugte.
Met al my familie
in die Kaap met vakansie, moes ek slaapplek kry in JHB - goekoop
slaapplek vra die swart inligtingsbeamplte agter die toonbank in
Engels? Ja, hy ken net die regte ouens. Baie vriendelik en met 'n
entoesiastiese behulpsaamheid van die bestuurder is ek weg met 'n
klassieke Afrika-minibus met nagemaakte leeu sitplekoortreksels en
al. Ek deel graag die taxi met 'n Griek van Bermuda af en 'n ander
swart man wat om verskoning vra omdat hy eers gou iets by die winkel
wou koop - wragtig beleefd dog ek. Die Griek loop oor van nostalgie
- vreeslik bly om weer terug te wees in SA. Benoud dog ek ek slaap
vanaand in Soweto vir 'n plakkers-ervaring, maar was hoogs beïndruk
met 'n paar-miljoene-kompleks met sekuriteitsheinings en pragtig
beligte swembad vol baljarende kleurlingetjies wat in Engels skreeu
van die pret. Wit en swart hang saam om die kroeg nes op Sewende
Laan en ek verstom my om te hoor dat Afrikaners regtig sulke plat
lekker loslit Engels met Afrikaanse kragwoorde tussenin besig . Vir
'n skamele R450 kry ek 'n luukse kamer en TV. Vir nog R70 neem hulle
my terug lughawe toe om 3h30 die volgende oggend vir 'n
bystandsvlug. Ek reken alles om in ponde en voel alles is baie
billik. In Engelandse terme kom ek nie te sleg daarvan af nie. 'n
R20 se telefoonkaart waarop staan "Yeah... totally" help
my om my mense in die Kaap te laat weet hoe ek vorder.
Ek kan Kulula
lugdiens ten sterkste aanbeveel. Sonder om te betaal vir 'n nuwe
vlugkaartjie en met vriendelike behulpsaamheid help die swart man en
swart dame by die twee toepaslike toonbanke my met 'n vroëe vlug
Kaap toe - net twee dae voor Kersfees en skaars plek vir 'n muis op
hulle vlugte. Die kaptein herhaal selfs alle afkondigings in mooi
Afrikaans wat ek regtig waardeer het.
By Kaapstadse
Internasionale Lughawe haal ek 'n splinternuwe bussie wat 'n
pendeldiens lewer in die Kaap. Ek onderhandel 'n billike R570
trippie Bettiesbaai toe. In Engeland sou dit ten minste dubbeld
soveel wees. Die Kleurlingbestuurder gesels lekker Afrikaans en
vertel my oor al die bendes in die Kaap en wys na al die
plakkershutte in Khayelitsha soos ons daar verby ry. 'n Klomp
Zimbabwe-ers, knor hy, wat hier kom moeilikheid maak. Ek sien die
pad al langs die berghange tussen die Strand en Kogelbaai is mooi
verbreed en die rykmanspaleise teen Gordonsbaai se berghange slaan
my asem weg. Ja, dit gaan goed in die NSA. Dit bou en ontwikkel
onverpoost. By Kogelbaai staan daar ten minste 4 nuwe Discoveries
voor die valhek en my taxi bestuurder sê hier kan dit maar rof gaan
as die mense begin mes steek agv te veel sterkwater. Ek sien baie
Kleurlinge met blink rygoed wat uitklim om tussen die blankes op die
strande te baljaar. Almal kom goed oor die weg.
Na die vakansie ry
ek toe saam met die familie terug TVL toe en geniet die son deur die
Karoo. By die Drie Susters padstal word ons op egte Boere manier
ontvang en ons koop 'n potjie van al wat 'n snaakse konfyt is op
hulle rakke.
Terug in Pta kyk ek
verbysterd na die aantal nuwe veiligheids-komplekse waar mense
blykbaar waansinnig meeding om absurde pryse vir leë erwe te betaal
om dan teen miljoene rande huise op te sit, en ek dog die Kaap is
luuks.
Net voor ek terug
is Engeland toe, is 'n vrou buite Pta verkrag en vermoor deur twee
swart mans wat in in 'n nabygeleë plakkerskamp aangekeer is.
My slotsom is dat
die NSA baie fasette het. Daar is die slegte, maar daar is ook
regtig baie welwillendheid onder swart en wit. Ek dink dis belangrik
dat ons wat Afrikaner vryheid nastreef mooi moet dink of spannings
politiek soos wat hier op PRAAG gesprekslys deur verskeie mense
voorgestaan word die enigste metode is om te handel. Ek voel
gekwalifiseerde samewerking het ook sy plek, om tog te illustreer
ons is deel van die oplossing en hiermee skakel ek beslis nie
aktivisme uit nie. Ons moet net gebalanseerd bly.
Vaughn Stoman
boontoe
