Kas Landman probeer in Beeld die werklikheid ontken deur te dink dat mens "in die groot Suid-Afrika dinge vir en in Afrikaans moet doen". Nie net het die "groot Suid-Afrika" onder die ANC van Afrikaans 'n staatlose taal gemaak nie, maar ons belastinggeld word ook gebruik om ons eie taal te ondergrawe en globale Engels te bevorder.

Vandaar dus die "oranje" strategie: om vryheid vir onssself in 'n eie staat te verkry. As die oranje-blanje-blou eers wapper sal ons Afrikaans juis in die groot Suider-Afrika en in die groter wêreld kan bevorder, met beheer oor ons eie belastings en Afrikaans as enigste amptelike taal. Alle maatskappye in Suid-Afrika sal Afrikaans op hul produkte hê, want daarsonder sal hulle nie die mark 'n welvarende en suksesvolle Afrikaanse Republiek wat deur oranje Afrikaners bewoon word, mag betree nie.

Die oranje opsie is dus 'n "wen-wen oplossing", om 'n gangbare gemeenplaas te gebruik. Daarsonder gaan Afrikaans nie oorleef nie, want ons skole en universiteite word onder staatsdwang verengels, ons museums en erfenisterreine word verwaarloos en ons verarm of moet emigreer as gevolg van rassekwotas in die ekonomie. Dan praat ons nie eens van geweldsmisdaad, grondonteiening en swak munisipale dienste nie.

Al wat ons nodig het, is 4% van die landoppervlak van Suid-Afrika, oftewel 30 000 kilometer, die grootte van België. Net soos die Belge sal 'n paar miljoen oranje Afrikaners in hul Afrikaanse Republiek meer produseer as die 40 miljoen inwoners van groot Suid-Afrika of die 600 miljoen in die baie groot Afrika suid van die Sahara saam.

Victor Hugo het gesê: "Sterker as 'n weermag is 'n idee waarvoor die tyd aangebreek het."

Dan Roodt