Ek wil graag een en ander verklarende opmerkings maak n.a.v. Pia Nänny se voorbladberig in Die Burger van 25 Oktober 2005, Brink vra geld vir meer tale aan US.

Dit is sekerlik so dat Prof. Brink uitgenooi is om by verlede Maandagaand se byeenkoms van besorgde studente 'n kort rede te hou.  Nietemin is dit ietwat eufemisties om dit te beskryf as sou hy 'n "groep belangstellendes ...toegespreek (het) oor die universiteit se bestaansdoel en taalbeleid."  Daar was Maandagaand weinig belangstelling onder dié wat daar teenwoordig was in die Rektor se neo-koloniale idees oor die taalkwessie.  Die uitnodiging was sekerlik eerder daarop gemik om die Rektor bloot te stel aan die progressiewe denke van Afrikaanse studente oor hulle moedertaal en die rol dáárvan aan die US. 

Nietemin het dit gelyk asof prof. Brink soos 'n wafferse Australiese bouler met 'n sweem van selfversekerdheid daar aangekom het, gedagtig om korte mette te maak met die "groep studente".  Hy het hom misgis, siende die formidabele groep sprekers wat na hom aan die woord was, sy boulwerk aan flarde geslaan het.

Vanuit studentegeledere het Christa van Zyl die harde feite van viktimisering en intimidasie van Afrikaanse studente deur personeellede van die US en selfs deur anderstallige medestudente te berde gebring.  Die realiteit hiervan is Maandagaand getoon deur 'n groep studente met SASCO en ANC Jeugliga t-hemde wat gepoog het om die byeenkoms te ontwrig deur halfpad deur die verrigtinge die saal binne te marsjeer.  Terwyl Wortel Strydom op die praktiese onwerkbaarheid van die sg. T-opsie gewys het, het  Richard De Almeida, wat homself as 'n swart Stellenbosse student beskryf het, beswaar gemaak teen die druk wat vanuit die Universiteit se raadsale op Afrikaanse studente uitgeoefen word om met Engels tevrede te wees.  

Christo van der Rheede van die Stigting vir Bemagtiging deur Afrikaans het 'n waarskuwing aan die US gerig dat dié universiteit nie kan toelaat dat Suid-Afrika terugkeer na 'n koloniale era waar Universiteite Engels is nie.  

Maar dit was Johann Rossouw van die F.A.K. wat Brink se boulaanval vernietig het.  Hy het die Rektor en ander hooggeplaastes wat besig is met 'n ideologiese stryd op Stellenbosch en die taalkwessie daarvoor misbruik voor stok gekry vir hulle openbare wanvoorstellings van die standpunte van diegene wat argumenteer t.g.v. Afrikaans aan die US.  Rossouw het op die belang van taalverskeidenheid gewys in die lig van globalisering, asook op die skokkende feit dat Afrika, 50 jaar na bevryding, nog steeds nie die belang van moedertaalonderrig besef het nie en bly vasklou aan koloniale tale wat deur die oorgrote meerderheid Afrikane nie verstaan word nie.  N.a.v. Prof. Brink se aangekondiging dat die US se taalbeleid volgende jaar weereens hersien gaan word, het Rossouw tereg gevra hoeveel vertroue 'n mens in 'n beleid kan hê wat elke drie jaar verander.  Oor die Rektor se onlangse gesprekke met die regering het Rossouw aangedui dat na al dié gesprekke, daar nog geen resultate was nie.

As oud-student wil ek die hoop uitspreek dat Stellenbosse studente sal voortbou op die momentum van Maandagaand en dié Universiteit se tradisie van stilswye en sikofansie sal verbreek.

Johan Botes, Kaapstad