12 Augustus 2002, Optog vir Afrikaans

MEDIAVERKLARING UITGEREIK DEUR PRAAG (PRO-AFRIKAANSE AKSIEGROEP) OP MAANDAG 12 AUGUSTUS 2002, VIR ONMIDDELLIKE VRYSTELLING:

 

Op Woensdag 14 Augustus vind 'n "Optog vir Afrikaans" in Hatfield, Pretoria plaas.  Die optog vertrek om 12:00 vanaf die piazza buite die Studentekafeteria van die Universiteit van Pretoria.  Twee studente-organisasies, PRAAG-Tuks en Tuks-Afrikaanse Studente, organiseer die betoging.  'n Ander groep studente van die Pretoriase Technikon sal ook aan die optog deelneem.

 

Die optog wil protes aanteken teen taaldiskriminasie, en die uitdryf van Afrikaans uit skole en universiteite.  Veral Minister Kader Asmal se pogings om Afrikaanse universiteite te dwing om te verengels, is die onderwerp van hul misnoeë.

 

Die gekose datum, 14 Augustus, is simbolies van die stryd vir die behoud en erkenning van Afrikaans wat 'n aanvang geneem het op dié datum in 1875 met die stigting van die Genootskap vir Regte Afrikaners.  'n Eeu en 'n kwart later word Afrikaans steeds nie erken as 'n amptelike taal nie, en geniet Afrikaanssprekendes steeds nie dieselfde regte en voorregte as Engelssprekendes nie.

 

Na afloop van die optog sal 'n memorandum van griewe by Asmal se kantoor afgelewer word.

 

Hierdie is die begin van 'n reeks aksies vir die herstel van die amptelike status van Afrikaans, wat tans in Suid-Afrika gruwelik misken word deur 'n Afrikaansvyandige regering wat taalregte op Mugabeagtige wyse minag.

 

Die studente wil ook met die optog bewys dat die kwaadwillige mite wat versprei word, as sou jongmense nie belang stel in die taalstryd nie, 'n infame leuen is.

 

PRAAG-Tuks, asook Tuks-Afrikaanse Studente, nooi alle belangstellendes uit om deel te neem aan die optog ten einde hul solidariteit te betoon met die daaglikse probleme van studente om lesings en studiemateriaal in Afrikaans te bekom.

 

Kontakpersoon:  Dr. Dan Roodt, PRAAG 0824901036