MEDIAVERKLARING DEUR PRAAG

Die Vriende van Afrikaans verdien 'n pluimpie vir hul goeie werk om Microsoft te oorreed om hul programmatuur in Afrikaans beskikbaar te stel. Nokia was egter die eerste multinasionale tegnologiemaatskappy wat aangekondig het dat hy Afrikaanse programmatuur in sy produkte gaan inbou.

Hierbenewens het Nokia dit ook moontlik gemaak om bestaande selfone gratis op te gradeer na 'n veeltalige model met Afrikaans daarop. 'n Mens sou graag wou sien dat Microsoft modules beskikbaar te stel om ouer weergawes van hul programmatuur ook op te gradeer met Afrikaans.

Terwyl Afrikaans steeds op alle gebiede agteruitboer, veral in die onderwys, verteenwoordig hierdie deurbrake om basiese aspekte van die moderne lewe soos persoonlike rekenaars en selfone in die taal om te skakel, tekens dat die keerpunt bereik is in die aftakeling wat veral sedert 1994 die norm is. Ten minste het die harde werk van taalorganisasies, asook die individuele lede van die publiek wat teen groot vyandigheid in poog om hul taal in winkels en teenoor die staat te handhaaf, 'n klimaat geskep waarin dit nou moontlik is om eise vir taalregte te stel.

Desnieteenstaande hierdie ligpunte, het Afrikaans geweldig veld verloor teenoor Engels oor die afgelope tien jaar, en om dit in te haal gaan steeds reuse-inspanning verg van alle taalaktiviste.

Daarom is dit noodsaaklik dat alle taalstryders hul aktiwiteite behoort te koördineer en maandelikse sittings van die Konfederale Afrikanerforum by te woon sodat ons wedersyds op hoogte kan bly met vordering in die taalstryd.