Die jongste nuus vanuit die burgemeesterskantoor te Pretoria is dat die stad se naam wel mag verander, hangende die bevinding van die sogenaamde "deskundige komitee". Die bevinding van die komitee is voorspelbaar, want dit is gepak met sogenaamde "deskundiges" wat vyandig staan teenoor die naam Pretoria.

Die enigste gevolgtrekking waartoe ons kan kom, is dat burgemeester Smangaliso Mkhatshwa voortgaan met sy naamsverandering, ongeag die teenkanting van Minister Mosiuoa Lekota en ander ANC-hooggeplaastes. Hiermee het die agbare burgemeester hom nie net in konflik met die inwoners van Pretoria gebring nie, maar ook met elemente in sy eie party.

Wat PRAAG betref, is ons geheel en al ontnugter met die dubbelspel van die ANC in Pretoria. Die woede van die inwoners is besig om op te vlam, en enkele Tshwane-tekens is reeds verander. Ons doen hiermee 'n beroep op alle inwoners om enige bord met die onwettige en ongewenste naam Tshwane onmiddellik dood te verf of te vervang met 'n teken waarop Pretoria pryk.

Indien die burgemeester ná die bekendmaking van die sogenaamde "deskundige" komitee se bevinding, steeds voortgaan met sy naamsverandering, sal dit beveg word met boikotaksies, die doodverf van naamborde en verdere betogings. Nóg PRAAG nóg die inwoners van Pretoria aanvaar hierdie neo-koloniale naamskending en aanslag op Afrikaans.

PRAAG doen hiermee 'n beroep op alle opposisiepartye om teen die ANC in Pretoria te verenig ten einde die mag aanstaande jaar tydens die munisipale verkiesings van die ANC weg te neem. Die DA, daarenteen, behoort dringend te besin of hy nog 'n rol het om in Pretoria te speel aangesien dié party tot dusver afwesig was in die stryd om Pretoria se naam te behou. Die manier waarop die DA insgelyks vir Mkhatshwa toelaat om die stad te regeer asof dit sy eie persoonlike leengoed verteenwoordig, is eenvoudig skandalig en getuig van 'n lamsakkige, ondoeltreffende en verbeeldinglose opposisie.

Dit is van die allergrootste belang om die ANC se mag in Pretoria te breek, nie net om die naam te behou nie, maar om ten minste die een stad in die land waar die grootste aantal Afrikaners saamgetrek is, uit die tentakels van die oorheerser te bevry.