MEDIAVRYSTELLING
DEUR PRAAG (PRO-AFRIKAANSE AKSIEGROEP) OP 25 OKTOBER 2005
Die uitspraak
deur die Noord-Kaapse Hooggeregshof teen skole in die Kuruman-omgewing kom
neer op die ontkenning van die reg op moedertaalonderrig in
enkelmediumskole. Dit gooi koue water op die aanvanklike optimisme ná die
Mikro-uitspraak dat 'n hofstryd, weliswaar teen enorme koste vir Afrikaanse
skole en ouers, ons taalregte sou kon afdwing.
Soos ons al
voorheen te kenne gegee het, spruit die huidige penarie waarin Afrikaans en
Afrikaanse onderwysinrigtings verkeer regstreeks uit die verraad van FW de
Klerk en Roelf Meyer, asook die Broederbond en die res van die
Afrikaner-establishment wat sonder enige mandaat van gewone Afrikaners aan
die ANC oorgegee het. Dit ly by ons geen twyfel dat die ANC geen steen
onaangeroer sal laat om Afrikaans uit te roei, skole en universiteite te
verengels en op die duur Afrikaners, hetsy onder te ploeg, hetsy uit die
land te verdryf na die Zimbabwe-model nie.
Daarom sal
ons mense hul naïwiteit en illusies wat deur die meeloper-media in stand
gehou word, moet laat vaar en moet besef dat weerstand teen die ANC-orde met
sy Afro-fascistiese optrede teen Afrikaans veel intenser gevoer sal moet
word by wyse van lydelike verset, strategiese kommunikasie met die buitewêreld
om die verdrukking en geweld waaraan ons blootgestel is, oor te dra, asook
die uitdaag van staatsgesag op verbeeldingryke maniere deur die aftakeling
van Afro-fascistiese simbole, ideologie en retoriek.
Ons doen ook
'n beroep op die totale Afrikanergemeenskap en alle Afrikaanse organisasies
om dringend oor die toekoms van Afrikaanse onderwys, wat direk deur die
Afro-fascistiese staat bedreig word, te besin. 'n Volkskongres met onderwys
as hooftema behoort so gou moontlik belê te word om die verdomming en
verengelsing van ons kinders te bespreek en altenatiewe onderwysmodelle
soos privaat onderwys, tuisonderrig en mikroskole te bespreek. Slegs deur
eendragtige optrede gaan die krisis waarin Afrikaanse onderwys reeds
verkeer, afgeweer kan word.
Teenoor die
Afro-fasciste wat ons toenemend oorheers, om nie van hul getransformeerde
kangaroehowe met narre soos die sogenaamde hoof-regter John Hlophe te praat
nie, wil ons sê dat julle nie sal slaag waar Milner, Kitchener en die
Britse Ryk gefaal het nie. Ons weier om ons taal af te lê en ons
geboorteland te verlaat soos julle kennelik vereis.
Intellektueel
en kultureel verkeer ons volk reeds in opstand teen die onreg wat ons
tans verduur. Die oorgrootte meerderheid Afrikaanse skrywers het hulle
byvoorbeeld teen die verengelsing van Stellenbosch uitgespreek.
Die huidige
uitspraak ten gunste van Engels op Kuruman maak ons bloot meer vasberande om
ons opstand te verdiep en te bestendig. Elkeen wat Afrikaans praat of skryf
of onderwys sondig teen die anglofiele orde van die Afro-fasciste.
Lank lewe
Afrikaans! Lank lewe die Afrikaner!
Dan Roodt
boontoe
