27 Maart 2002

27 Maart 2002, Fisieke intimidasie by Korrektiewe Dienste

Hiermee reik PRAAG (die Pro-Afrikaanse Aksiegroep) die volgende mediaverklaring uit op 27 Maart 2002 om 11h15:

Ná PRAAG die Departement van Korrektiewe Dienste gedreig het met 'n dringende aansoek om sy diskriminasie teen Afrikaans en Afrikaanssprekendes te staak, het die Departement 'n eksamen wat môre Donderdag 28 Maart gehou sou word, afgelas. Hierdie eksamen by die Zonderwateropleidingskollege naby Pretoria was die onderwerp van 'n dispuut weens die departement se voorskrif dat geen vraestel wat in Afrikaans beantwoord sou word, gemerk sou word nie.

Die Departement van Korrektiewe Dienste, soos ook Justisie en Openbare Werke, het dit op hom geneem om geheel al buite die Grondwet te tree. Artikel 6 (3) (a) verplig elke staatsdepartement om ten minste twee amptelike tale te gebruik.

Terwyl die departement voorheen voorgegee het dat daar geen opdrag bestaan dat Afrikaans nie gebruik mag word nie, het hy in 'n brief aan PRAAG se prokureurs, asook in dokumentasie wat aan die studente by Zonderwater versprei is, duidelik die standpunt gestel dat geen ander taal behalwe Engels voortaan as eksamentaal toegelaat sal word nie. Die DKD verwys na 'n "uitvoerende besluit" wat in dié verband geneem is op 18 Maart 2002.

Berigte van fisieke intimidasie, asook dreigemente, is deur PRAAG ontvang van studente by Zonderwater. Studente is ook vanmôre gedwing om 'n dokument te onderteken waarin hulle afstand doen van hul taalregte en Engels aanvaar as voertaal en eksamentaal. Geen eksemplaar van hierdie dokument is egter beskikbaar gestel nie, selfs nie eens aan die ondertekenaars daarvan nie. PRAAG poog tans om 'n kopie daarvan te bekom ten einde dit nietig verklaar te kry deur PANSAT (Pan-Suid-Afrikaanse Taalraad).

Daar is reeds twee klagtes teen die Departement van Korrektiewe Dienste hangende by PANSAT, wat aantoon in watter mate hy die argwaan en misnoeë van sy eie werknemers ontlok. Dat daar ook verskeie ondersoeke van korrupsie teen amptenare van die departement aan die gang is, getuig van die laksheid waarmee daar omgegaan word met reëls, beginsels en regte in die departement.

PRAAG spreek hom ten sterkste uit teen die voortdurende ongrondwetlike taalsituasie by die DKD, asook die Mugabeagtige dreigemente en intimidasietegnieke wat gebruik word by Zonderwater. Die poging om studente se taalregte weg te neem deur hulle te dwing om 'n onderneming te teken, is laakbaar en hoort tuis in 'n Stalinistiese strafkamp.

PRAAG gaan voort met regsoptrede teen die departement. Hoewel môre se eksamen uitgestel is tot aanstaande Donderdag 4 April, is die taaldispuut nog geensins opgelos nie, veral nie in die lig van die departement se onlangse optrede nie. Viktimisering van studente wat op Afrikaans aandring, hou aan.

Daarom word 'n dringende aansoek voorberei deur PRAAG se regspan wat in alle waarskynlikheid net na die Paasnaweek gebring sal word. Die Milneristiese en koloniale afdwing van Engels tot nadeel van elke ander taal in Suid-Afrika verteenwoordig 'n laagtepunt in die huidige bewind se rekord tot dusver.

In sy brief gedateer 26 Maart 2002 verklaar die DKD dat "geen antwoordstel in enige taal behalwe Engels gemerk sal word nie". Hiermee diskrimineer die departement teen die moedertale van 93% van die land se bevolking.

Die feit dat die departement op kort kennisgewing 'n eksamen kan afstel ten einde die regsproses teen hom te fnuik en verdere uitstel te bekom, toon nie net dat hy geensins die belange van die stundente en die goeie orde van die Zonderwatersentrum op die hart dra nie, maar bereid is om van hul opleiding en toekoms 'n politieke speelbal te maak. Ten einde sy leë magsvertoon te handhaaf, is die departement bereid om jongmense te benadeel en hul mees basiese menseregte te vertrap.

Die mense van Suid-Afrika gaan nie langer buig voor die Stalinisme en Mugabeïsme van die DKD en ander staatsdepartemente nie. Ons dring aan op ons regte. Indien ons hoegenaamd in 'n "demokrasie" woon, behoort gedrag soos dié van die DKD onmiddellik gesanksioneer te word met die afdanking van die betrokke persone, asook die bedanking van Minister Ben Skosana wat toegelaat het dat sake in sy departement handuit ruk.

PRAAG praat namens 93% van die land se bevolking as hy sê dat gedwonge verengelsing nie langer aanvaarbaar is nie. Ons vestig die publiek se aandag daarop dat die vorige bewind wat hom ingestel het op gedwonge verengelsing ook gebruik gemaak het van volksmoord op onskuldige vroue en kinders waarvan die honderdjarige herdenking vanjaar plaasvind. Die terugkeer van koloniale taalverdrukking en totalitarisme moet met hand en tand beveg word. Ons doen 'n beroep op die media om hulself in die sterkste moontlike terme hierteen uit te spreek, want die toekoms van demokrasie en die regstaat in Suid-Afrika is in die gedrang.

Op hierdie noot bedank ons graag daardie koerante soos Beeld en Rapport wat in hoofartikels die standpunt uitgespreek het dat benadeling van studente deur hulle te ontneem van moedertaaluitdrukking tydens 'n eksamen ontoelaatbaar is.

Ons doen verder 'n beroep op die publiek om by te dra tot PRAAG se fondse ten einde hierdie saak tot in die hoogste hof in die land te voer, want ons mag nie toelaat dat die Departement van Korrektiewe Dienste met 'n pennehaal ons van regte ontneem waarvoor mense al tweehonderd jaar stry en reeds op die slagveld en in konsentrasiekampe die hoogste prys betaal het nie.