29 April 2002

29 April 2002, Afrikaans by Potchefstroomse Universiteit

MEDIAVERKLARING UITGEREIK DEUR PRAAG (PRO-AFRIKAANSE AKSIEGROEP) OM 14H30 OP MAANDAG 29 APRIL 2002:

Die onlangse aankondiging deur dr. Theuns Eloff, rektor van die Potchefstroomse Universiteit vir CHO, dat 'n buitelandse verslag aanbeveel het dat die universiteit wegbeweeg van sy taalmedium na "tweetaligheid" toe, is 'n kommerwekkende ontwikkeling.

Ná die PUK geïndentifiseer is as die laaste oorblywende Afrikaanse kampus, is die universiteit aangeval deur Minister Kader Asmal, wat summier die voorsitter van die ANC-jeugliga op die Raad daarvan benoem het. Asmal se uitlatings teen Afrikaanse universiteite het tot die Gerwelverslag gelei, waarvan ons intussen weinig verneem het.

Dit is duidelik dat die onderwysowerheid, en dan spesifiek Asmal, 'n beleid van ondergrawing volg teenoor Afrikaans op tersiêre vlak. Dit is ook baie helder dat Potchefstroom, anders as byvoorbeeld prof. Andreas van Wyk wat tot onlangs rektor was van Stellenbosch, min of meer geen weerstand bied teen ministeriële en ander vorme van druk om die kampus te verengels nie.

Tydens PRAAG se bywoning van 'n openbare debat op die kampus enkele weke gelede, het ons gekonstateer dat Afrikaanse reeds in 'n mindere posisie verkeer teenoor Engels, aangesien die verrigtinge byna uitsluitlik in daardie taal plaasgevind het.

Daar bestaan byna twintig uitsluitlik Engelstalige universiteite in Suid-Afrika, waarop geen druk geplaas word om meertalig te word nie. Die huidige verengelsing van Potchefstroom, wat voorspel is in die openbare uitlatings van dr. Eloff tydens Mariëtta Kruger se Prontuit-program op KykNET, verteenwoordig die grand finale van die aggressiewe diskriminasie teen Afrikaans op tersiêre vlak sedert 1994. Dit kom kort op die hakke van die aankondiging deur die Pretoriase Akademiese Hospitaal dat geen ander taal as Engels voortaan toegelaat sal word by dié hospitaal nie.

Die PUK, vanweë sy plattelandse ligging, was 'n laaste bastion vir Afrikaans as wetenskapstaal. Die manier waarop dr. Eloff, in samewerking met die ANC-regering, besig is om teen Afrikaans aldaar op te tree, maak 'n bespotting van die Suid-Afrikaanse grondwet wat kastig voorsiening maak vir tweetaligheid.

In die onlangse weke was daar egter al soveel gevalle van taalvertrapping deur die owerheid, asook Mugabeagtige intimidasie van Afrikaanstaliges, dat die jongste nuus oor Potchefstroom kwalik verras. Dat die owerheid reeds male sonder tal sy vyandigheid teenoor Afrikaans bewys het, staan reeds vas. Dit is egter vir ons betreurenswaardig dat die bestuur van Potchefstroom, wat uit Afrikaanse instellings kom, so min waarde heg aan hul eie erfenis dat hulle bereid is om die weg van die minste weerstand te volg en eenvoudig te hensop voor die eise van Engelse politieke korrektheid.