29 April 2002

29 April 2002, Barnard bedank by Korrektiewe Dienste

MEDIAVERKLARING UITGEREIK DEUR PRAAG (PRO-AFRIKAANSE AKSIEGROEP) OP MAANDAG 29 APRIL OM 14h00

Mnr. Wesley Barnard, die amptenaar van die Departement van Korrektiewe Dienste wat verbied is om sy eksamenvraestelle in Afrikaans te beantwoord, het bedank uit die departement. Hiermee verval sy dringende aansoek in die Pretoriase Hooggeregshof omdat daar nie langer gronde vir so 'n aansoek sou wees nie, gegewe sy bedanking.

Dr. Dan Roodt van die Pro-Afrikaanse Aksiegroep betreur hierdie verwikkeling. "Ons het ons bes probeer om mnr. Barnard te oortuig om aan te gaan met sy stryd vir Afrikaans aan die Zonderwater -opleidingskollege, maar verstaan dat hy nie langer kon volhou weens die intimidasie en konstante druk op hom en sy familie nie."

Volgens inligting tot PRAAG se beskikking is mnr. Wesley Barnard op verskeie maniere geïntimideer, en het hy selfs doodsdreigemente ontvang. Dit wil voorkom asof daar in die departement of daarbuite individue is wat fanaties teen Afrikaans en Afrikaners gekant is, en wat voor niks sal stuit om die taal te onderdruk nie.

Die gebeure by Zonderwater, asook die reaksie van die DKD wat poog om 'n ongrondwetlike eentalige beleid te handhaaf, hou niks goeds in vir die toekoms van Afrikaans nie. Die verdrywing van mnr. Wesley Barnard uit die departement spreek ook boekdele aangaande die etniese onverdraagsaamheid wat kennelik daar heers teen Afrikaanssprekendes. Vorige uitlatings soos "fok die Boere" was daarom net die voorspel tot verdere anti-Afrikaanse optrede deur die bestuur en amptenare van die departement.

PRAAG beskou die Wesley-Barnard-insident as 'n skande vir Suid-Afrika, en 'n klad op die veelgeroemde demokratiese bestel wat daar in ons land sou heers. Indien Afrikaanssprekendes wat op hul taalregte aandring, nie van hul persoonlike veiligheid verseker is nie, watter toekoms het veeltaligheid in Suid-Afrika?

Die student by Korrektiewe Dienste, soos bygestaan deur PRAAG, se aansoek om sy eksamen in Afrikaans te mag skryf is besig om te ontwikkel in 'n toetssaak vir Afrikaans in die hele staatsdiens. Die Departement van Korrektiewe Dienste hou voet by stuk dat studente nul behoort te kry indien hulle vraestelle in enige ander taal as Engels beantwoord.

Die DKD is insgelyks bereid om die belastingbetaler se geld te verkwis in 'n poging om eiehandig die Grondwet in die howe te herskryf ten einde Engels-eentaligheid op sy studente en werknemers af te dwing. PRAAG het aanvanklik hierdie saak gesien as 'n dringende aansoek om die betrokke student se taalregte erken te kry. Dit lyk egter asof die Departement die beginsel van veeltaligheid in staatsdepartemente as sodanig uitgeskakel wil sien ten gunste van net Engels. In stukke voor die hof het die Departement selfs geargumenteer dat enige student wat sy vraestel in Afrikaans sou beantwoord, selfs terwyl hierdie saak nog hangende is, nul behoort te kry sonder die opsie van 'n vertaling van die antwoordstel.

Vir die oomblik het Regter Chris Botha die DKD se voorstel verwerp en tussentydse regshulp aan die student gegee. Selfs indien die staat se siening van eentaligheid sou seëvier, is die keuse van 'n eventuele vertaling van die antwoordstelle deur die regter toegestaan in 'n bevel op Woensdag 3 Maart 2002. Die student behou sy reg om vraestelle in Afrikaans te beantwoord, hangende 'n bevinding deur die Hooggeregshof in Pretoria. Die departement is tot 19 April gegee om redes aan te voer waarom studente nie in Afrikaans hul vraestelle mag beantwoord nie.

PRAAG se opsomming van die situasie is dat die Departement van Korrektiewe Dienste so vasbeslote is om sy eentalige beleid erken te kry op grond van die "praktiese verkieslikheid van Engels" dat hy waarskynlik die saak op appél sal neem na die Grondwetlike Hof. Sodoende kan 'n presedent geskep word vir alle staatsdepartemente en alle staatsondersteunde opleiding in Suid-Afrika.

Viktimisering van die student, asook familielede van hom wat werksaam is in die DKD, hou steeds aan. Dr. Govender, die hoof van die Zonderwateropleidingskollege, waar die frase "Fok die Boere" voorheen gebruik is, is blykbaar iemand wat Afrikaners haat en dus bereid is om Afrikaans met alle mag en geweld te bestry.

PRAAG wou graag een of ander tyd 'n grondwetlike saak teen 'n staatsdepartement aanvoer ten einde die uitskakeling en aftakeling van Afrikaans te stuit. Dit is soveel te meer nodig aangesien staatsdepartemente, soos bv. Openbare Werke, hulle nie steur aan PANSAT se bevindings nie. Hierdie departement het byvoorbeeld 'n bevinding wat in die Staatskoerant gepubliseer is, geïgnoreer, kompleet met sperdatums waarteen Afrikaans tot sy vorige posisie herstel moes word.

Die probleem waarteen PRAAG tans te staan kom is dat, terwyl die staat se fondse onbeperk is, ons waarskynlik nie die fondse gaan hê om die huidige saak enduit te veg nie. Die gevaar bestaan dan dat Afrikaans vir altyd benadeel kan word en permanent uit die staatsdiens geweer kan word, bloot weens 'n gebrek aan fondse om 'n duur, komplekse hofsaak te voer wat in die Grondwetlike Hof mag eindig indien dit op appél sou gaan.

PRAAG doen daarom 'n beroep op beide die publiek en ander Afrikaanse organisasies om by te dra tot die koste van hierdie hofgeding wat bepalend vir die toekoms van die taal mag wees. Ons mag nie toelaat dat 'n staatsdepartement na willekeur die grondwet herskryf na eentaligheid toe nie.

Ons indruk is dat al die staatsdepartemente, soos Korrektiewe Dienste, Openbare Werke, Justisie, die Polisiediens, die Weermag, ens., besig is om Afrikaans uit te gooi en alle opleiding en kommunikasie oor te skakel na Engels. As mens in ag neem dat daar onlangs reeds 'n hele paar Hooggeregshofaansoeke was om skoolhoofde van Afrikaanse skole weer aan te stel ná hulle summier geskors is eenvoudig omdat hulle Afrikaans by hul skole wou handhaaf, verkry die gebeure 'n sinistere aanskyn. Daar is inderdaad 'n staatsgedrewe golf van verengelsing aan die gang wat die amptelike status van Afrikaans ongedaan gaan maak en die horlose gaan terugdraai na die vroeë jare van die vorige eeu toe die taal ná die Britse oorwinning van 1902 geen amptelike status gehad het nie.

Mense wat wil bydrae tot PRAAG se fondse vir die doeleindes van die huidige toetssaak vir Afrikaans, kan die volgende nommer skakel gedurende kantoorure: 011 469 0292. Andersins kan e-pos gerig word aan inlig@praag.org.