|
MEDIAVERKLARING DEUR
PRAAG (PRO-AFRIKAANSE AKSIEGROEP) OOR GEO CRONJÉ-DEBAKEL OP 29
AUGUSTUS 2003
VRYSTELLING: ONMIDDELLIK
Die intense heksejag wat
daar teen die Springbokslot, Geo Cronjé, uitgebars het, demonstreer
weereens die onstabiele en fundamentalistiese aard van die
Suid-Afrikaanse samelewing. Cronjé is reeds in die media aan "rassisme"
skuldig bevind omdat hy glo vir een aand nie 'n kamer wou deel met
sy medeslot en mededinger om 'n plek in die span, Quinton Davids,
nie.
Die moontlikheid dat die hele debakel
georkestreer is om hom uit die span te hou, kan geen redelike mens
ontgaan nie. Hierbenewens is Cronjé as "konserwatief"
bestempel omdat hy glo sy moedertaal, Afrikaans, praat en handhaaf.
Dit mag dus wees dat Cronjé self die slagoffer is van rassisme en
chauvinisme vanweë sy Afrikanerskap. Dit is bekend dat Engels die
afgelope jare in rugbykringe afgedwing is, en dat die verengelste
Afrikaners aan die stuur van SA Rugby erg haatdraend teenoor die
taal staan.
Voor en ná rugbywedstryde word daar
slegs Engels gepraat, en vir alle praktiese doeleindes het die
Springbokrugbyspan 'n Engelse span geword.
Indien Cronjé hom hoegenaamd skuldig
gemaak het aan enige wangedrag, wat op hierdie stadium nog glad nie
bewys is nie, kan enige sodanige optrede ook verklaar word aan die
hand van die intense haatveldtog teen Afrikaans en Afrikaners wat
tans gevoer word deur die onderdrukking van Afrikaans, moorde op
plaasboere, verwydering van standbeelde en plekname, en dergelike
meer. Dit mag wees dat hy gemarginaliseer en geviktimiseer gevoel
het as gevolg van sy etnisiteit en dat hy bloot gereageer het op
kwetsende houdings en taal van ander spanlede. In gevalle soos dié
is een party nooit volkome skuldig nie, en is daar altyd 'n ander
kant van die saak.
Die behandeling wat Cronjé tans ontvang,
waar hy uit alle oorde beswadder word voordat die werklike
besonderhede bekend gemaak is, laat die vraag ontstaan of daar nog
hoegenaamd plek is vir enige Afrikaners in die Springbokrugbyspan.
Terwyl Afrikaanse plekname verander word as apartheidsname, is dit
nie hoog tyd dat die naam van die nasionale rugbyspan insgelyks
gewysig word nie?
PRAAG betreur veral die erge verguising
van Cronjé deur politieke partye. Van die ANC is dit sekerlik te
wagte, maar die feit dat sowel die NNP as die DA wat in 'n mate nog
Afrikanersteun geniet of hulle beroep op Afrikanerkiesers, hulle kan
skuldig maak aan die algemene uitbarsting van etniese haat jeens
Cronjé behoort die boodskap deur te stuur dat Afrikaners voortaan
'n ander politieke tuiste behoort te soek.
Soos PRAAG dit al voorheen beklemtoon
het, en ongeag Cronjé se eie optrede waaroor ons tans net kan
spekuleer, is mindere voorvalle van etniese wrywing in 'n
multietniese land soos Suid-Afrika onvermydelik. Krapperige
gevoelens bestaan al jare lank tussen Engelse en Afrikaners,
byvoorbeeld. Tensy daar sprake is van vervolgbare gedrag soos crimen
injuria of aanstigting tot rassehaat - waarvan die meeste voorvalle
tans teen Afrikaners self gemik is - behoort geringe insidente onder
sportlui wat in mededinging verkeer nie buite verband geruk te word
nie.
Afrikaanse rugbyspelers in die
Springbokspan behoort dit ernstig te oorweeg om uit die span te
bedank ná die onbillike en oordrewe verguising van hul spanmaat,
want elkeen behoort te weet dat hy die volgende slagoffer van so 'n
propagandistiese en ideologiese aanslag kan wees.
Kontakpersoon: Dan Roodt 0824901036
|