MEDIAVERKLARING DEUR PRAAG

MEDIAVERKLARING DEUR PRAAG (PRO-AFRIKAANSE AKSIEGROEP) OOR BURGEMEESTER MKHATSHWA SE JONGSTE SET, ASOOK DIE ELEKTRONIESE PETISIE OOR DIE NAAMSVERANDERING VAN PRETORIA

DATUM: 30 AUGUSTUS 2003

Nadat PRAAG Woensdagaand 'n elektroniese petisie op sy webwerf www.praag.org beskikbaar gestel het, is reeds ná aan 500 name ontvang van mense wat hulle uitspreek téén die beoogde naamsverandering van Pretoria. Intussen het die burgemeester, mnr. Smangalise Mkhatshwa, tydens die jongste munisipale raadsvergadering verklaar dat "al Tshwane se inwoners inspraak sal hê in die besluit" om die naam te verander.

PRAAG verwerp hierdie gedagte, aangesien die huidige Tshwane-gebied vyf gebiede uit die Noord-Wes-provinsie insluit wat nog nooit enigiets met Pretoria te make gehad het nie. Dit is ook nie regverdig dat Centurion, Akasia en ander gebiede wat nie onder Pretoria val nie, daarby betrek moet word nie. Dit sou ewe absurd wees om die inwoners van Soweto of Durban te vra om hulle oor Pretoria se naam uit te spreek.

Die enigste billike en demokratiese beginsel wat behoort te geld, is dat die inwoners van die historiese Pretoriagebied hulle moet uitspreek oor die naam van hul stad.

Hoewel Mkatshwa besig is met 'n gekonkel om die uiteindelike konfrontasie met die inwoners van Pretoria te vermy, is PRAAG vol vertroue dat die naamsverandering gestuit sal word, mits die publiek aanhou om hul teenkanting op 'n aktiewe manier te betoon. Daarom is dit allernoodsaaklik dat elkeen die elektroniese petisie teen die naamsverandering op www.praag.org moet onderteken.

Die winkelsentrums in Pretoria is onwillig om die verspreiding van petisies toe te laat, uit vrees vir viktimisering deur die munisipale owerheid. Dus is die internet en selfone die enigste manier om die name van petisionarisse te versamel. SMS-boodskappe kan ook gestuur word aan inlig@praag.org [spasie] tik dan jou naam en adres, en versend aan die nommer 4004 vir Vodacom-gebruikers en 083 123 6245 vir MTN-gebruikers. Alle name sal deur PRAAG op die elektroniese petisie geplaas word en aan die burgemeester van Pretoria voorgelê word.

Tot dusver is dit duidelik dat die opposisie teen die Pretoriase naamsverandering veel groter is as die steun daarvoor. Meer as 6 000 Tukkie-studente het reeds petisies teen die naamsverandering onderteken, en die betoging wat deur PRAAG op kort kennisgewing gereël is, is bygewoon deur meer as 200 mense op 16 Augustus. Gerugte van 'n pro-Tshwane-betoging wat die daaropvolgende Maandag gehou sou word, is nooit gerealiseer nie.