ANC-BESETTER VERVREEM PRETORIANERS MET BOIKOT

Die minagtende besluit van die sogenaamde Tshwane-metropolitaanse raad om die Pretoria 150-vieringe te boikot kom kort op die hakke van die ewe provokatiewe en ongewilde naamsverandering vir Pretoria wat deur "burgemeester" Smangaliso Mkhatshwa afgekondig is.

Namens die Pretoria bly Pretoria-aksiekomitee, asook die Pro-Afrikaanse Aksiegroep (PRAAG) wil ons die geagte "burgemeester" die versekering gee dat dié klap in die gesig nie ongemerk verbygaan nie. Tienduisende mense word aanstaande Saterdag 12 November by die Voortrekkermonument verwag wat die bestaan van Pretoria vir anderhalf eeu gaan herdenk. Die feesgangers sal daarop attent gemaak word dat die ANC-besetter in die stadhuis van Pretoria, wat sy huidige oorheersing deur geweld en intimidasie soos die Kerkstraatbom bereik het, tevrede is om hul belastinggeld in te oes en op sy eie propagandasirkusse te verkwis, maar nie bereid is om die minste erkenning aan die geskiedenis van Pretoria te verleen nie.

Ons doen 'n beroep op die publiek om aanstaande Saterdag se Pretoria-karnaval by die Voortrekkermonument in groot getalle by te woon, ten einde aan die ANC-besetter te toon dat ons nie bereid is om te emigreer of uit die land te verdwyn soos hy blykbaar van ons vereis nie. Dog ná afloop van die huidige vieringe, sal al die inwoners van Pretoria dringend by die Pretoria bly Pretoria-trust moet registreer om maandeliks hul belasting- en dienstegeld in een bedrag aan die stadsraad oor te betaal. Dit sal Pretoria die nodige beheer oor sy finansies gee ten einde met die ANC-besetter te kan onderhandel oor die verkwisting en wanbesteding van munisipale finansies, soos byvoorbeeld op die ongewenste naamsverandering.

Trouens, die naamsverandering van Pretoria is 'n duidelike voorbeeld van Afro-fascisme, in die styl van Afro-diktators soos Robert Mugabe, Mobutu Sese Seko, Idi Amin Dada en ander. Hoe gouer Pretorianers wys dat hulle nie langer met sulke absurditeite gediend gaan wees nie, hoe beter.

Die anti-Afrikaanse en anti-blanke houding van die "burgemeester" en sy sogenaamde "metroraad" was reeds voorheen bekend. Deur sy jongste stap het die ANC-besetter hom nog verder van Pretoria en sy groot Afrikanerbevolking vervreem.

Dat Pretoria al hoe meer die lokus van stryd tussen die plaaslike bevolking en die sentrale regering gaan word, is gewis.