Die nuus dat R100 miljoen aan 70 mislukte "grondhervormingsprojekte" slegs in die Noord-Transvaal (tans "Limpopo") bestee is, bevestig dat Suid-Afrika besig is om Afrika se mislukte rasgedrewe kollektiwisme te herhaal.

Toevallig het die BBC se Afrika-radiodiens onlangs 'n program uitgesaai waarin die vraag gevra word: "Waarom kan die kontinent nie homself voed nie?" Deel van die antwoord sou wees: omdat daar eers in Zimbabwe en nou in Suid-Afrika "grondhervorming" toegepas word.

Selfs onder normale omstandighede verteenwoordig die tipe eksperimente in grondhervorming en kollektiwisering van landbou wat tans deur die dept. van grondsake toegepas word, bedenklike en rassistiese beleid. Gegewe die omstandighede van grootskaalse hongersnood in Suider-Afrika, kom dit egter op waansin neer. In feite is die Suid-Afrikaanse bewind besig om belastingbetalersgeld aan te wend om bestaande boerderye wat deur blanke boere bedryf word, te vernietig.

Diegene wat glo dat die ANC onder invloed van liberale demokrasie en die vrye markstelsel sy oorspronklike revolusionêre projek laat vaar het, hoef maar net te kyk na wat op landbougebied gebeur om onder 'n ander indruk te kom.

Thoko Didiza en haar amptenare is vasbeslote om 'n Zimbabwe in Suid-Afrika te laat gebeur en die R100 miljoen wat in die Noord-Transvaal verkwis is, is maar net die begin van die vernietigingsproses.