|
Dan Roodt 8
November 2005 In
SA is dit elke dag 1 April |
Sedert die ANC aan bewind
gekom het, het Suid-Afrika gewoond geraak aan een absurde nuusitem na
die ander. Die jongste berigte oor die naamsverandering van
Bloemfontein en die toepassing van rassekwotas selfs op die toeskouers
van rugby, stel egter nuwe standaarde wat
geen malhuis sal oortref nie.
Trouens, in Suid-Afrika is dit
elke dag 1 April, oftewel Gekkedag. Waarom anders sou daar 'n
voorbladberig wees dat Bloemfontein se naam na dié van 'n perd
verander gaan word? Keiser Nero het sy perd as lid van die Romeinse
Senaat aangestel, daarom is daar seker 'n presedent vir hierdie soort
eer wat aan viervoetiges toegeken word.
Maar terselfdertyd wonder 'n
mens: gaan die volgende dorp in die Vrystaat na 'n hond of 'n kat
vernoem word? Moontlik sal Brandfort voortaan "Wagter" heet
en Kroonstad "Kietsie", of wat ook al die gebruiklike hond-
en katname in Suid-Sotho sou wees.
Asof die arme rugbyspelers nie
al genoeg onder rassepolitiek deurgeloop het nie, is die jongste nuus
dat sowel die spelers as die toeskouers binne tien jaar
"demografies verteenwoordigend" moet wees. Indien my
hoofrekene my nie in die steek laat nie, sal die gemiddelde span slegs
een blanke lid mag hê, want blankes verteenwoordig slegs 9% van die
bevolking.
Maar hoe gaan dit vir
toeskouers werk? Gaan elkeen 'n DNS-toets van sy ras moet voorlê
alvorens hy 'n kaartjie vir 'n wedstryd mag bekom? Met slegs 9% van
kaartjies wat vir blanke ondersteuners beskikbaar is, sal hulle seker
voor elke wedstryd teen hoë pryse opgeveil word, terwyl swart
kaartjies feitlik verniet weggegee sal word.
Die ANC kan net sowel nou al
'n totale verbod op blanke bywoning by rugbywedstryde plaas, want die
effek van toeskouerkwotas gaan dieselfde wees.
Wie weet, miskien word
Johannesburg een van die dae na Winnie Mandela se parkiet vernoem...
of marmotjie. Net nie 'n witmuis nie, want dit sal teen die kwotas
sondig.
boontoe
|