Sowel die dagblad Beeld as mnr. Kallie Kriel van die Pretoriase Burgerlike Aksie is van mening dat 'n kompromie oor die naamsverandering moontlik is. In die eietydse idioom van Amerikaanse gemeenplase, bestempel mnr. Kriel die gebruik van twee name as 'n "wen-wenoplossing".

Logika en gesonde verstand sê egter dat een plek nie twee name kan hê nie. Die huidige naamstryd het immers juis ontstaan vanweë die verwarrende gebruik van twee name vir die stad Pretoria, een "administratiewe" naam en een "geografiese" naam.

Volgens die ANC het die administratiewe naam reeds in 2000 die geografiese naam vervang. Om die weg van kompromie voort te sit, gaan die huidige beweging teen die naamsverandering kniehalter.

Die geskiedenis van kompromieë wat Afrikaners oor die afgelope vyftien jaar aangegaan het, het hulle niks in die sak gebring nie. Mens sou trouens kon sê dat hierdie halfhartige, kruiperige houding vir hul huidige penarie verantwoordelik is. Die ANC sien in ons 'n lamsakkige, ruggraatlose volk waaroor daar straffeloos baasgespeel kan word.

Die saak téén die Pretoriase naamsverandering is egter reg. Die publiek is eenhonderdpersent agter die versetsbeweging. Daar bestaan historiese én finansiële gronde wat pleit vir die behoud van "Pretoria". Om sake nou te beduiwel met verdere kompromiepraatjies sou ramspoedig wees.

Ons sê: Tshwane delenda est. Hierdie belaglike naam moet vir eens en vir altyd met wortel en tak uitgeroei word. Al moet ons elke naambord elke dag van die week gaan verf.