Die koste van bloed gaan styg omdat die regering weier om te erken dat verskillende rasse of genetiese groeperinge 'n anderse vatbaarheid vir siekte soos byvoorbeeld MIV mag hê. Dié politieke ingryping in die wetenskap is soortgelyk aan die sogenaamde Lisenkoïsme in die voormalige Sowjet-Unie.

In 1948 het Lisenko by 'n kongres van die Kommunisteparty die genetika van Mendel as "reaksionêr en dekadent" beskryf, waarop daar so te sê 'n verbod op enige verdere genetiese navorsing in Rusland geplaas is. Dit was 'n groot wetenskaplike terugslag vir dié land wat hom  op dié gebied dekades agter die Weste geplaas het.

Ironies gebruik die ANC ras as 'n juridiese begrip in sy regstellende aksie-wetgewing, maar ontken dit as 'n epidemiologiese kategorie. In die huidige Februarie-uitgawe van die gesaghebbende American Journal of Human Genetics bevind prof. Neil Risch van die Stanford-universiteit ná 'n uitgebreide studie dat mense se eie plasing van hulself binne 'n rassekategorie so akkuraat is dat dit slegs 0,14% van wetenskaplike analises verskil.

In 'n ander artikel, "Categorization of humans in biomedical research: genes, race and disease" in Genome Biology maan prof. Risch en sy medewerkers soos volg: "'n 'Ras-neutrale' of 'kleurblinde' benadering tot biomediese navorsing is nóg regverdig nóg voordelig en sal nie tot 'n verlaging van verskeidenheid in siekterisiko of behandelingsdoeltreffendheid tussen groepe lei nie. Verskille in behandelingsreaksie of siektevoorkoms tussen rasse-/etniese groepe moet versigtig bestudeer word; naïewe afleidings oor genetiese oorsake sonder getuienis behoort vermy te word."

Dis 'n wetenskaplike en empiriese feit dat die voorkoms van MIV onder lede van die swart of Afrika-rassegroep hoër is as onder blankes of Oosterlinge. Die ANC is besig om, soos Lisenko, die wetenskap as "reaksionêr en dekadent" te tipeer en sy eie politieke siening daarop af te dwing. Net soos wat sy aanvanklike ontkenning van die MI-virus reeds tot die dood van miljoene mense bygedra het, gaan ontvangers van bloed aan hoër risiko van MIV-oordrag blootgestel word, boonop teen 'n hoër koste.

Suid-Afrika kan Lisenkoïsme nie bekostig nie.