Vroeër vandeesweek is daar berig dat mnr. Smuts Ngonyama, sekretaris-generaal van die ANC, Afrikaans met haar 130ste verjaardag gelukwens. Hierop het PRAAG 'n verklaring uitgereik waarin die ANC se agterbaksheid verwerp word.

Asof dié ongevraagde, skynheilige "gelukwensing" nie genoeg was nie, het die regime nou in sy weeklikse pontifikale uitspraak op die internet, ANC Today, die poging om Afrikaans heuning om die mond te smeer, voortgesit.

Het die ANC mal geword? Waarom volhard die Afro-nasionalistiese bewind wat gewoonlik 'n beleid van sistemiese rassisme teen Afrikaners toepas - waarvan taaldiskriminasie maar een van die manifestasies is - in sy pogings om hom as kampvegter vir Afrikaans voor te doen? Niks kan seker meer absurd wees as om te dink dat die ANC met sy "English only"-beleid wat sedert 1994 met kwalik verdoeselde aggressie afgedwing is, nou besig is om die Afrikaanse saak met digterlike romantiek te besing nie.

Die rede vir die "English only"-regime se ongemak oor Afrikaans is dat die ANC se propagandamasjien steeds verwoesting saai, behalwe as dit by taal kom. Reeds met die Inligtingskandaal tydens die sewentigerjare het die Nasionale Party - en daarmee saam die Afrikaner - se vermoëns om enigsins 'n ideologie te verdedig 'n ernstige knou verkry. Die uiteindelike ineenstorting van die NP, asook die eens magtige Broederbond, het die Afrikaner magteloos gemaak sover dit sy propagandavermoëns betref. Met die openbare televisie en radio onder sy beheer, het die ANC eenvoudig voortgegaan om met hamerslae sy ideologie in die land te vestig.

Danksy die volgehoue pogings van taalstryders wat egter ook gereeld in die blaaie van Nasionale Perskoerante as "taalbulle", "maniakke", "geestesversteurdes", ens. verguis word, is die ANC se oënskynlik meedoënlose propaganda-oorlog teen alles wat Afrikaans is - ten minste wat die taal self betref - suksesvol gestuit.

Met hul jarelange opleiding deur die Russiese KGB en die Oos-Duitse Stasi, is die ANC en sy SAKP-bondgenoot natuurlik daarvan bewus dat slegs totale ideologiese beheer oor die land sy langtermynoorheersing sal verseker. Een manier om die netelige taalkwessie te ondervang, is om eenvoudig voor te gee dat die regerende party nie Afrikaansvyandig is nie. Terwyl ons arme taal agter die skerms ondermyn en afgetakel word in die naam van 
"English only".

Eerder as wat die skynbare ommeswaai in die ANC se houding jeens Afrikaans dus dui op 'n nuutgevonde, vreemde waardering vir die Afrikaanse kultuur, is dit tekenend van die regime se bewustheid dat hy besig is om te retireer sover dit sy voortgesette propaganda-oorlog teen die Afrikaner betref.

Waarskynlik sal die skoothondjiekoerante in die Naspersstal poog om die groeiende taalbeweging, veral onder jongmense, te probeer ondergrawe deur die sirenesang van "die opheffing van al elf tale, Engels inkluis" aan te hef.

Sedert die Inligtingskandaal wat sy uiteindelike afgang verseker het, is die Afrikaner besig om vir die eerste keer in drie dekades punte teen sy Angel-Saksiese en deesdae Afro-Saksiese vyande aan te teken.

Dis nou die tyd om die stryd teen die ANC en "English only" met hernieude ywer voort te sit.

29/09/05 03:09