Die voortslepende debakel rondom die Universiteit van Pretoria se taalbeleid is besig om absurde afmetings aan te neem. Die vise-rektor van die universiteit, prof. Chris de Beer, het vandeesweek aan studente gesê dat hulle kan kies tussen 'n UP wat oornag verengels en een wat geleidelik verengels.

Die minagting waarmee die huidige bestuur die Afrikaanse studentekorps behandel, kom daarop neer om die Afrikaner te tart. Oor feitlik 'n eeu heen het Afrikaners in die noorde van die land hul geld en arbeid in die Universiteit van Pretoria gestort om dit een van die voorste opvoedkundige instellings in die land en in die wêreld te maak.

Vandag laat prof. Chris de Beer, asook die rektor, prof. Calie Pistorius die Afrikanerstudent op die kampus onwelkom voel. Boonop word 200 miljoen rand se beurse elke jaar aan anderstaliges toegeken wat regstreeks of 0nregstreeks deur die betalende Afrikanerstudente befonds word.

Dit is 'n aanduiding van Afrikaner-ordentlikheid dat De Beer en Pistorius nog nie aangerand is of dalk iets erger oorgekom het nie. In enige ander land en in enige ander gemeenskap sou sulke uittartende gedrag lank reeds deur meer ekstremistiese studente of dalk hul ouers met geweld beantwoord gewees het.

Dat die Afrikaanse studente aan die UP reeds moedeloos raak, blyk uit vandeesweek se besetting van die hoofbestuur se kantore.

Sowel die rektor van Tukkies as sy bestuur moet weet dat 'n hele volk se oë vandeesweek op hulle gerig is in die samesprekinge rondom die taalkwessie wat met studente moet volg. Die universiteit moet weet dat indien hy gaan aanhou om bloot die ANC-regering terwille te wees, hy toenemend in konfrontasie met die groot aantal Afrikaners in Pretoria en die ou Transvaal gaan tree.

Tot dusver het die universiteit hom op sy minste verraderlik gedra sover dit Afrikaanse taalbelange betref. Maar ook die onverkwiklike toepassing van rassekwotas t.o.v. die mediese en ander studierigtings, maak dit baie duidelik waar die bestuur se lojaliteite lê.

Veral die taal wat De Beer vandeesweek teenoor studente gebruik het, is so vermetel dat hy die Afrikaner 'n verskoning skuldig is.

Dit is hoog tyd dat ons moderne hensoppers met dieselfde minagting behandel word as wat hulle kennelik vir hul eie mense voel.

29/09/05 03:09