|
Dan Roodt 30
November 2005 Wil
die polisie plaasmoordenaars beskerm? |
Die nuus
dat boere van TLU-SA wat by plaasveiligheidsprogramme betrokke is nou
deur die SAPD geteiken word deur opsporingsapparaat aan hul motors aan
te bring, toon in watter mate die staat en sy organe onder politieke
beheer van die ANC staan. Dit is dus nie vergesog om die SAPD voortaan
as die ANC se Gestapo te bestempel nie.
Boere en ander inwoners in die
Noord-Transvaal word daarvan verdink dat hulle uit protes teen
ongewilde naamsveranderings naamborde verf. Teen hierdie onbenullige
oortredings wat met graffiti vergelyk kan word, word spesialiseenhede
van die polisie ontplooi wat hulle gewoonlik met staatsveiligheid of
die bekamping van georganiseerde misdaad besig hou.
Intussen bly die
Limpopoprovinsie 'n slagveld waar plaasmoordenaars oënskynlik
straffeloos hul gang gaan. Verdagte moordenaars en geweldenaars se
voertuie word kennelik nie bedraad met opsporingsapparaat nie.
Minister Jackie Selebi se
opmerking dat dit "absurd is om van die polisie te verwag om
winkelsentrums teen gewapende roof te beskerm" versterk die
indruk dat die SAPD deesdae 'n beleid van laisser aller teenoor
misdaad handhaaf en eerder
wetsgehoorsame burgers wat van politieke inkorrektheid verdink word,
wil teister.
Die vrees het altyd bestaan
dat die ANC soortgelyk aan soveel Afrikaregerings die staatsmag vir sy
eie politieke doelwitte sal gebruik. Die manier waarop daar tans teen
boere opgetree word, laat min twyfel dat daar geen verskil meer tussen
Suid-Afrika en 'n land soos Zimbabwe is nie.
Individuele vryheid en die reg
op privaatheid wat kwansuis in die grondwet verskans is, word byna
daagliks deur die SAPD en ander staatsdepartemente vertrap.
Wat egter nog meer
kommerwekkend is, is dat die SAPD deur sulke optrede teen boere wat by
plaasveiligheidsaksies betrokke is die indruk skep dat hy kop in een
mus met plaasmoordenaars verkeer. Weereens kan mens nie verhelp om die
parallel met sommige mislukte Afrikastate te tref nie en waar
staatsamptenare dikwels kriminele aktiwiteite onder die beskerming van
staatsgesag bedryf.
Geniet plaasmoordenaars dus
deesdae die indirekte beskerming van die Suid-Afrikaanse polisie?
boontoe
|