Frankryk se Soweto?
PARYS - Ongeveer 1300 voertuie is oornag in Frankryk deur Arabiese en swart jeugdiges verbrand. Dit was die mees gewelddadige nag sedert die aanvang van onluste in dié land tien dae gelede en 349 persone is gearresteer. Geweld het aanvanklik in Parys uitgebreek, maar het agterna na vele stede en dorpe op die platteland versprei.
Volgens
die polisiehoofkantoor is 1295 voertuie uitgebrand - 741 in die sentrale
Ile-de-France-streek en 554 op die platteland. Volgens dieselfde bron is 349
mense gearresteer, teenoor 253 die vorige nag.
In
totaal is 211 munisipaliteite deur die geweld geraak, teenoor 140 die vorige
nag.
Oornag het die aantal voertuie wat verbrand is dus in die Ile-de-France rondom
Parys met 'n honderd toegeneem, maar op die platteland verdubbel. "In die
omgewing van Parys bou dit op, terwyl dit in die ander streke besig is om te
versprei," het 'n polisiewoordvoerder gesê.
Oor die afgelope vier nagte het ons meer as 700 arrestasies uitgevoer, wat 'n
aanduiding gee dat ons maatreëls doeltreffend werk," het hy bygevoeg.
Volgens die polisie vermy die onlusmakers oor die algemeen direkte konfrontasie
met die veiligheidsmagte.
Volgens die ministerie van binnelandse sake, is 2300 polisie- en kommandolede as
versterkings na die sentrale Ile-de-France-gebied gestuur, waarby die normale
pesoneel getel moet word. Een-en-twintig polisiemanne is gedurende die nag lig
beseer, wat die totale aantal geregsdienaars wat sedert die begin van die
onluste beseer is op 56 te staan bring.
In Parys self het die ministerie 28 uitgebrande voertuie getel.
In die omgewing van Parys is twee laerskole te Grigny in die Essonne-departement
aan die brand gesteek. Een van die skoolgeboue is erg beskadig, maar niemand is
beseer nie. Ook in die Essonne, is 'n herwinningsaanleg te Vigneux aan die brand
gesteek, maar volgens die prefektuur van polisie "is daar niks wat daarop
dui dat dié geval aan die stedelike geweld verbind kan word nie".
Supermarkte aan die brand gesteek in Evreux
In die departement van Seine-Saint-Denis, waar onluste op 27 Oktober begin het,
het die situasie gisteraand kalmer gelyk as die vorige aand, volgens 'n
woordvoerder van die prefektuur.
In Noisy-le-Grand (Seine-Saint-Denis) is 'n gimnasium nogtans aan die brand
gesteek, wat veroorsaak het dat 'n gebou langsaan ontruim moes word. In
Villeneuve Saint-Georges (Val-de-Marne) is 'n jeugherberg afgebrand.
Elders verkeer 'n man wat Vrydagaand deur 'n jeugdige geslaan is in die dorp van
Stains (Seine-Saint-Denis) steeds
in 'n diep koma, berig die koerant Le Parisien wat beweer dat "sy lewe in
gevaar is".
Op die platteland is Evreux in die Eure-departement veral deur die onluste
geraak. 'n Vyftigtal voertuie is al langs die hoofstraat uitgebrand. Die
winkelsentrum in La Madeleine-buurt was die tooneel van botsings tussen groepe
jeugdiges en die polisie. Verskeie mense is beseer, waaronder die direkteur van
openbare veiligheid en 'n munisipale polisieman.
'n Supermark in 'n ander buurt van die stad was insgelyks die teiken van die
onlusmakers en 'n poskantoor, sowel as twee skole het die vlamme ten prooi
geval.
In
die omgewing van Lyon, het die polisie verslag gedoen dat ongeveer twintig
voertuie in Vénissieux en Bron uitgebrand is. Daar was geen direkte botsing met
die onlusmakers nie.
"n Dosyn voertuie is in Avignon (Vaucluse) verbrand, veral in die
Monclar-buurt suid-oos van die stad, het die brandweerdepartement laat weet.
In
Toulouse het die polisiebestuur berig dat tientalle voertuie verbrand is en twee
mislukte pogings tot brandstigting op die munisipale biblioteek en 'n
winkelsentrum in die buurt van Bellefontainte-Le Mirail plaasgevind het.
In die Noordelike departement is 110 voertuie verbrand (twee keer soveel as die
vorige nag), asook 'n dertigtal vullishouers. Die brandweer is 160 keer ontbied,
hoofsaaklik in Lille en Roubaix. Geweld het na dorpe versprei wat tot nogtoe
gespaar gebly het, soos Douai, Duinkerken of Maubeuge.
Gevalle van geweld het ook uitgebreek in Dreux (Eure-et-Loire), Nantes (Loire Atlantique) en in le Grand Nancy (Meurthe-et-Moselle) waar individue die stadsaal van Vandoeuvre aangeval het.
06 November 2005 04:27:26 PM