Pretoria is afstootlik - Mkhatshwa
Enkele maande gelede
het Vader Smangaliso Mkhatshwa, die burgemeester van Pretoria, voor 'n gehoor van
skoolkinders verklaar, “Die naam Pretoria vind ek afstootlik.” Verlede
naweek het hy in 'n onderhoud met 'n Sondagkoerant laat blyk dat hy vasbeslote
is om die stadsnaam te verander.
Mkhatshwa was ook
afwysend teenoor beswaarmakers jeens die naamsverandering, en het hulle as 'n
minderheid beskryf wat nog nie behoorlik aangepas het by die nuwe Suid-Afrika
nie. Volgens hom staan die meerderheid van Pretoria se Afrikaanse inwoners
“ongeërg” teenoor die naamsverandering en sou hulle nie omgee indien die
stad Tshwane heet nie.
Verlede Saterdag het
meer as 200 inwoners van Pretoria, tesame met die sanger Steve Hofmeyr en lede
van PRAAG in Paul Krugerstraat betoog teen die naamsverandering. Daar word ook
beplan om 'n belastingboikot te organiseer indien Mkhatshwa sy dreigemente sou
uitvoer.
Sedert die Vader
burgemeester van Pretoria geword het, het uitgawes op luuksereise na die VSA in
die besonder gestyg, en enkele maande gelede wou hy en sy gevolg R700 000 bestee
aan 'n reis wat maar enkele dae sou duur. Ná opposisieklagtes is die begroting
vir dié Amerikaanse reis verminder na R500 000.
Mkhatshwa woon in 'n
luuksehuis van etlike miljoene rand in die voorstad Muckleneuk. Die uitstaande
skuld van sy metroraad beloop tweemiljard rand waaronder oningevorderde skuld,
asook 'n bankoortrekking van R500 miljoen. Die koste van 'n naamsverandering vir
Pretoria, wat konserwatief geskat word op etlike honderde miljoene rande, blyk
geen invloed uit te oefen op die burgemeester nie.
Net 'n week gelede het die burgemeesterskantoor by monde van mnr. William Baloyi die indruk geskep dat die naamsverandering moontlik heroorweeg sou word, iets wat somminge protesgroepe laat praat het van “uitsteltegniek”. Nou blyk dit dat die uitstel kwalik 'n week geduur het, want Mkhatshwa is reeds besig om sterk voorspraak te maak vir die naamsverandering. Volgens hom setel die mag van 'n stad in die sentrum, en moet die naam daarvan die voorkeure van die maghebber weerspieël. -PRAAG 29/09/05 03:09