|
Taalpetisie
Ons, die ondergetekende Suid-Afrikaners, maak hiermee beswaar
teen die onbillike behandeling van Afrikaans deur die huidige
regering, en veral deur die ongelyke status wat Afrikaans beklee
teenoor Engels. Nie net is hierdie bevoordeling en bevoorregting van
Engels teenoor Afrikaans (en ander tale) strydig met die
Suid-Afrikaanse grondwet nie, maar dit spreek ook van ’n
chauvinisme en koloniale aangewesenheid op die eertydse Britse
metropool wat onvanpas is in ’n onafhanklike Republiek soos
Suid-Afrika. Ons eis onmiddellike gelykberegtiging van
Afrikaans teenoor Engels deur alle owerhede, hetsy sentraal,
provinsiaal of plaaslik, asook deur alle maatskappye of instansies
wat in staatsbesit is of onder staatsbeheer verkeer soos byvoorbeeld
die uitsaaikorporasie wat tans onder ’n uitsluitlik Engelse naam
bekend staan as die SABC. Die gebruik om slegs Engels as voertaal
van genoemde owerhede aan te wend, moet dadelik gestaak word en
Afrikaans moet te alle tye in ten minste ’n gelyke posisie teenoor
Engels verkeer.
Ons verwerp die propagandistiese en rassistiese stereotipering
van Afrikaners deur veral die SABC in sy programme en vra dat ’n
meer gebalanseerde raad wat verteenwoordigend is van alle Suid-Afrikaners
aangestel word.
Afrikaans moet onmiddellik in ere herstel word op die
Suid-Afrikaanse paspoort vanwaar dit in ’n daad van taalfascisme
verwyder is ten einde die indruk te skep dat Afrikaanssprekendes nie
volle burgers van Suid-Afrika is nie.
Ons spreek ons uiterste teenkanting uit teen die voorstel van
Minister Penuell Maduna om Afrikaans as verslagtaal naas Engels in
die howe te verwyder en waarsku die betrokke minister dat dit die
aansien van die Suid-Afrikaanse regstelsel nog verder kan aftakel te
midde van die korrupsie en ondoeltreffendheid wat dit reeds teister
en waaroor wyd berig word.
Ons versoek insgelyks die owerhede om dadelik die druk van watter
aard ookal wat toegepas word om opvoedkundige en ander instellings
te laat verengels, stop te sit. Geen instelling met Afrikaans as
voertaal behoort verengels te word nie. Waar verengelsing reeds
plaasgevind het, moet hierdie proses omgekeer word.
Die gebruik van ministers en ander ampsbekleërs om slegs
toesprake in Engels te hou, of aankondigings slegs in Engels te doen,
moet gestaak word en ’n beduidende aantal toesprake, aankondigings,
amptelike communiqués, ens. behoort in Afrikaans gehou te word.
Indien sommige lede van die owerheid nie Afrikaans na behore magtig
is nie, behoort Afrikaanse taalonderrig aan hulle beskikbaar gestel
te word op soortgelyke wyse as wat Suid-Afrikaanse diplomate
onderrig ontvang in die tale van oorsese lande waarheen hulle
uitgeplaas word.
Ons nooi alle Suid-Afrikaners, ongeag ras, geslag, kleur, geloof,
huistaal of seksuele voorkeur, en wat Afrikaans en die Afrikaanse
kultuur liefhet om hulle saam met ons te beywer vir die
gelykberegtiging van Afrikaans. Ons bevestig dat Afrikaans aan die
hele Suid-Afrika behoort, dat dit eie is aan die land en oor ’n
spesifiek Suid-Afrikaanse karakter beskik, en daarom volle amptelike
erkenning behoort te geniet.
Ons sal nie gekoloniseer word nie!
Boodskap aan die leser: Om hierdie petisie elektronies te
onderteken, stuur ’n boodskap soos “Ek, Eugène Nielen Marais,
vereenselwig my met die Taalpetisie”, d.w.s. ’n boodskap waarop
jou volle naam verskyn, aan die volgende adres:
taalpetisie@mweb.co.za
Werf jou vriende en familie, en stuur ook hulle name saam! Druk
die petisie uit en werf fisieke name en handtekeninge in jou
plaaslike skool, kerk, klub, supermark of werkplek wat jy aan die
volgende posadres kan stuur:
Taalpetisie
Posbus 87250
Houghton
2041
Hierdie petisie gaan uiteindelik aan Pesident Thabo Mbeki
oorhandig word by geleentheid van ’n optog na die Uniegebou. Die
mikpunt is ’n miljoen handtekeninge!
Jy kan die verskil maak!
Dan Roodt
boontoe
|
