menings

 opstelle

 poësie

 satire

 aksies

 skrywers

 abba

 skakels

 briewe

 uit-BEELD

 uit-RAPPORT

 tuis

(Met apologie aan Marietjie Louw van Beeld)

Graskop (Mamparralanga). – Onbekendes het die standbeeld van Jock of the Bushveld, oorlede stamhoof van die plaaslike Staffordshire-honderas, op die pad tussen Sabie en Graskop gesteel.

Gemoedere het hoog geloop in plaaslike hondegeledere, en daar was ‘n samedromming van rondloperbrakke om lamppale in Graskop. Die emosionele gesnuiwery aan agterstewes het gedreig om handuit te ruk en daar was plek-plek glo ‘n gehappery. Van die teenwoordiges het ook gedreig om kateienaars se grasperke te gaan bevuil.

‘n Duitse herdershond, die leier van die trop, het trane in sy oë gehad terwyl hy na die klipstaander waarop die beeld voorheen was, gestaar het. "Ek voel beledig."

Mnr. Rottweiler Doberman, Mamparralanga se LUR vir Hondesake en Vermiste Gedenkwaardighede, het 'n beroep op die dorp se viervoetiges gedoen om nie toe te laat dat die daad verdeeldheid tussen spesies veroorsaak nie. "Só 'n daad het die potensiaal om probleme te veroorsaak. Ons vra die honde om bo dit uit te styg en nie toe te laat dat dit moeilikheid veroorsaak nie. Ons moet veral nie summier aanneem dat die skuldiges afgedwaalde leeus of olifante uit die naburige Nasionale Krugerwildtuin was nie."

Dié berig kom 'n week nadat die DBV beslis het dat die dorp se naam Graskop moet bly en nié terugverander word na die tradisionele naam waaronder Graskop onder die diere van die omgewing bekend gestaan het nie. Volgens die uitspraak van die DBV sou mense glo gesukkel het om die vorige naam uit te spreek en sou dit hul menseregte geskend het.

Die tropleier het gister by die voetstuk van die gesteelde standbeeld geblaf dat hy hom skaam vir dié vandalistiese daad.

"Diere moet onthou dat dade van diefstal nie ons ryke en gesofistikeerde geskiedenis van hoë beskawing kan wegneem nie. Ons sal elke dag teen die voetstuk piepie ter nagedagtenis", het hy gesê.

Volgens hom is die standbeeld se diefstal duidelik die werk van diegene wat nie glo dat Suid-Afrika aan alle spesies behoort nie.

Polisielede het die gebied gefynkam vir urienmonsters en het gipsafdrukke van voetspore rondom die beeld gemaak.

Mnr. Kietsie Siamees, 'n bekende onder katgeledere in die dorp, het gesê 'n groep besorgde katte sal betaal vir ‘n privaatspeurder om die beeld op te spoor.

"Wat gebeur het, gee die dorp en katte oor die algemeen 'n slegte naam. Nie alle katte beskou honde as ‘n minderwaardige spesie nie, en van my beste vriende is honde. Ek skaam my dat dit gebeur het. Ons en honde is immers almal lid van die groot familie Mammalia."

(Bostaande is gedeeltelik gegrond op ‘n ware gebeurtenis: Volgens Radio 702 is die standbeeld van Jock of the Bushveld inderdaad vir maande lank al soek. Die bronsbeeld is opgerig ter nagedagtenis aan die diereheld in die bekende verhaal deur Sir Percy Fitzpatrick.)

29 September 2005 03:09 AM

Boontoe