|
SlykNet, die
Afrikaanse TV-kanaal bied met trots aan, ‘n program vir die
connoisseur:
LUNSKAFEE
Op hierdie vertoonvenster van die
Afrikaanse kunste, sal u af en toe ‘n bietjie Afrikaans hoor,
meesal uit Namibië waar die kameraspan per ongeluk ‘n paar
plattelanders raakgeloop het wat nie Engels verstaan nie. Maar
moenie bekommer nie, LUNSKAFEE probeer sy bes om
onder normale omstandighede die hoeveelheid Afrikaans op die program
te beperk, ingeval kykers onder die indruk kom dat daar wel af en
toe kunste in Afrikaans gepleeg word.
Op die pas afgelope uitgawe van LUNSKAFEE
kon u dus volledige Engelse onderhoude, soms onderbreek met
enkele woorde Afrikaans, aanhoor oor die volgende:
Die eienares van ‘n winkel wat
keramiekhouers verkoop. ‘n Mens kan selfs ‘n keramiekvullishouer
daar koop sodat die vullisverwyderaars jou met meer respek kan
behandel op Woensdae.
‘n Vrou wat snuisterye versamel en
hulle in ‘n "galery" tentoonstel. Dis ‘n slim
advertensie vir die Kaapse strande, want na dese stel niemand
hoegenaamd belang om ‘n galery te besoek nie.
Ten minste twee Engelse toneelstukke
in die genre "seksklug met ‘n boodskap". LUNSKAFEE
was geëerd om dié twee produksies te adverteer aangesien
geen Engelse radiostasie of TV-program kans gesien het daarvoor nie.
LUNSKAFEE bevat ook
vele bydraes van ‘n Christelike aard, en die vermenging van God,
Engels en kuns berus op die bekende spreuk: God is an Englishman.
‘n Onderhoud met die bekende "nuwe
regse" Antjie Krog wat meen dat die groot politieke filosoof,
Dimitri Tsafendas, haar gehelp het om haar land te verstaan. Krog se
bydrae was uiters steurend aangesien sy geen Engelse woorde of
sinsnedes gebruik het nie, maar miskien kan dit volgende keer
oorgeklank word of van onderskrifte voorsien word.
Gerugte wil dit hê dat u aanstaande
week op LUNSKAFEE die volgende te wagte kan wees:
‘n Onderhoud met die
winkelvensterversierder by Woolworths wat praat oor die kunstige
nuwe kussingslope wat hulle ingekry het. Hierdie onderhoud sal in
die gewone Englikaans gevoer word, dus sonder onderskrifte.
‘n Onderhoud met ‘n Christelike
boemelaar wat sy eie plakkaat geprakseer het waarop staan: "GOD
BLES... PLEZE HELP." LUNSKAFEE was so
beïndruk met die kreatief taalvaardige en boonop Christelike
boemelaar dat hy moontlik ‘n weeklikse bydrae gaan lewer.
‘n Opwindende bydrae oor Barney’s
Paint Centre se nuwe kleurskakerings wat in die afdeling oor "beeldende
kuns" ingesluit is.
In die tydgleuf vir LUNSNET word
‘n onderhoud gevoer met Koggelmander Strafhom wat
sy navorsing in uiters moeilike omstandighede by die Ranch en die
Summit Club gedoen het. Ter ere van Strafhom gaan LUNSNET voortaan
die B.J. Vorsterprys vir borrelbadletterkunde toeken wat direk op LUNSKAFEE
uitgesaai sal word.
Om dit verder te beklemtoon dat LUNSKAFEE
as program ‘n voorstander is van loslitafrikaans, is die
missie van die program verander na: "Out to lunch by die
lunskafee!"
Boontoe
|
