Loodvergiftiging is weer met ons as Beeld se humorlose poltieke rubriekskrywer my van "naïewe goedgelowigheid" beskuldig oor ek 'n valse persverklaring aangaande die vertoon van vlae op Potchefstroom geglo het.

Die rede waarom die fiktiewe persverklaring so oortuigend was, is omdat dit so naby aan die werklikheid was. Weliswaar is Afrikanervlae nie op die Potch-kampus verbied nie; dit word slegs "ontmoedig".

Die leier van die ANC-jeugbeweging op die kampus, Jaghuide Heyman, vertoon blykbaar 'n ANC-vlag oop en bloot in sy koshuisvenster. Nie lank gelede nie, het die heer Heyman Beeld se briewekolom geheel en al oorheers met sy politiek korrekte menings oor Suid-Afrikaanse vlae.

Oranje, wit en blou gee glo aanstoot, terwyl groen, geel en swart aanvaarbaar is. 'n Mens vermoed lankal dat Lood/Beeld en die geklike ANC-jeugbeweging kop in een mus is as dit by die bevordering van die ANC-vlag kom!

Maar soos ek 'n week of wat gelede op die internet geskryf het n.a.v. kwotas vir rugbyspelers én -toeskouers: elke dag is 1 April in die nuwe Suid-Afrika. Op die einste PUK het die ANC-gesinde raad van die universiteit Afrikaans in sy vergaderings verbied, al is daar tolkdienste beskikbaar. 'n Verbod op Afrikaans word "meertaligheid" genoem, of so iets.

Nie dat Gekkedaggrappe van ons universiteite af iets snaaks is nie: Maties gee vir Bram Fischer 'n eredoktorsgraad en Tukkies weier om die pas afgelope demokratiese studenteverkiesing te erken omdat blanke studente nie vir swart kandidate gestem het nie. Terwyl swartes natuurlik nie vir blanke kandidate hoef te stem nie.

Hulle sê as jy mal voel in 'n malhuis, is jy dalk die enigste persoon wat nog al jou varkies het. Vir Lood is alles natuurlik heel normaal, hetsy op die rugbyveld, hetsy op die kampus. Solank as wat Lood sy medikasie gereeld neem en dit roerend eens is met Jaghuide Heyman, is alles dooddollies.

Dan Roodt